Покраїнскa скупштинскa одлукa о випатрунку и хаснованю символох и традиционалних символох Автономней Покраїни Войводини

("Сл. новини АП Войводини", число 51/2016)

На основи члена 9. пасус 6. Статута Автономней Покраїни Войводини («Службени новини АПВ», число 20/2014),

Скупштина Автономней Покраїни Войводини, на схадзки хтора отримана 15. септембра 2016. року, принєсла

ПОКРАЇНСКУ СКУПШТИНСКУ ОДЛУКУ
О ВИПАТРУНКУ И ХАСНОВАНЮ СИМВОЛОХ И ТРАДИЦИОНАЛНИХ СИМВОЛОХ АВТОНОМНЕЙ ПОКРАЇНИ ВОЙВОДИНИ

Член 1.

Зоз тоту одлуку ше ушорює детальни випатрунок и хаснованє символох и традиционалних символох Автономней Покраїни Войводини (у дальшим тексту: символи АП Войводини).

Символи АП Войводини тоти: застава, традиционална застава, герб и традиционални герб.

Випатрунок символох АП Войводини утвердзени зоз Статутом Автономней Покраїни Войводини, а детальни випатрунок утвердзени зоз членом 8. и 12. тей одлуки.

Член 2.

Зоз символами АП Войводини ше представя Автономну Покраїну Войводину (у дальшим тексту: АП Войводина) як автономну териториялну заєднїцу Републики Сербиї.

Символи АП Войводини ше виклада у форми яка утвердзена з тоту одлуку, у складзе зоз законом, тоту одлуку, другима предписанями и протоколарнима узансами, так же би ше нє нарушовало угляд и достоїнство АП Войводини.

Член 3.

Заставу и традиционалну заставу АП Войводини ше виклада вєдно зоз заставу Републики Сербиї кед зоз законом або другим предписаньом предвидзене викладанє застави Републики Сербиї, з поставяньом на право од застави Републики Сербиї.

Заставу и традиционалну заставу АП Войводини ше нє шме хасновац кед су очкодовани або кед су пре свой випатрунок нєподобни за хаснованє.

Член 4.

Застава и традиционална застава АП Войводини, вєдно зоз заставу Републики Сербиї, пирха на будинкох Скупштини Автономней Покраїни Войводини (у дальшим тексту: Скупштина АП Войводини), Покраїнскей влади, будинкох орґанох локалней самоуправи на териториї АП Войводини и будинкох покраїнских орґанох и службох хтори снує АП Войводина.

Заставу и традиционалну заставу АП Войводини ше вєдно зоз заставу Републики Сербиї виклада у салох у хторих ше отримує схадзки Скупштини АП Войводини и схадзки Покраїнскей влади.

Заставу и традиционалну заставу АП Войводини ше виклада у службених просторийох предсидателя Скупштини АП Войводини и предсидателя Покраїнскей влади, а мож их викладац и у других службених просторийох покраїнских орґанох и службох хтори снує АП Войводина.

Заставу и традиционалну заставу АП Войводини мож хасновац и у других случайох кед їх хаснованє нє у процивносци зоз законом и тоту одлуку.

Член 5.

Заставу и традиционалну заставу АП Войводини ше виклада на виберацких местох на дзень виберанкох за посланїкох до Скупштини АП Войводини.

Член 6.

Заставу и традиционалну заставу АП Войводини ше у дньох жалосци виклада на пол копиї, односно на пол катарки.

Член 7.

Заставу и традиционалну заставу АП Войводини ше нє шме поставиц так же би дорушовали жем, анї як подлогу, подкладач, пресцерач, завису и подобне.

Зоз заставу и традиционалну заставу АП Войводини нє мож закривац превозки або други предмети, анї з нїма украшовац конференцийни столи або бешеднїци, окрем у форми столней заставки.

Кед ше заставу и традиционалну заставу АП Войводини виклада на бешеднїци, муши ше их поставиц на копиї з правого боку бешеднїка або на муре за бешеднїком так же би их бешеднїк нє засланял.

Член 8.

Жридловнїки (еталони) застави и традиционалней застави АП Войводини ше чува у Скупштини АП Войводини и по нїх ше оформює застави хтори ше хаснує.

Ґеометрийни конструкциї жридловнїка застави и традиционалней застави АП Войводини ше находза у додатку хтори твори состойну часц тей одлуки.

У шицких случайох яки наведзени у тей одлуки мож викладац и традиционалну заставу зоз традиционалним гербом на штредку застави, у одредзеней зрозмири.

Член 9.

Герб и традиционални герб АП Войводини ше вєдно хаснує:

- на будинкох Скупштини Автономней Покраїни Войводини, Покраїнскей влади, будинкох орґанох локалней самоуправи на териториї АП Войводини и будинкох покраїнских орґанох и службох хтори снує АП Войводина,

- у салох у хторих ше отримує схадзки Скупштини АП Войводини и схадзки Покраїнскей влади,

- у службених просторийох предсидателя Скупштини АП Войводини и предсидателя Покраїнскей влади, а мож их викладац и у других службених просторийох покраїнских орґанох и службох хтори снує АП Войводина,

- у составе печацох покраїнских орґанох и службох хтори снує АП Войводина,

- на грамотох, дипломох и других явних припознаньох хтори додзелюю покраїнски орґани,

- на дипломох и свидоцтвох о школованю хторе закончене на образовней установи чий снователь АП Войводина,

- на леґитимацийох посланїкох у Скупштини АП Войводини и членох Покраїнскей влади.

Герб и традиционални герб АП Войводини мож хасновац и у других случайох кед їх хаснованє нє у процивносци зоз законом и тоту одлуку.

Член 10.

Герб и традиционални герб АП Войводини мож похасновац зоз предходну согласносцу Покраїнскей влади, як состойну часц амблему, односно знаку.

Герб и традиционални герб АП Войводини нє мож похасновац як робни або услужни знак, прикладнїк, модел або други знак за означованє роби або услугох.

Герб и традиционални герб АП Войводини ше нє шме хасновац кед су очкодовани або кед су пре свой випатрунок нєподобни за хаснованє.

Член 11.

Герб и традиционални герб АП Войводини ше хаснує вєдно з гербом Републики Сербиї кед зоз законом и другима предписанями предвидзене хаснованє гербу Републики Сербиї, з поставяньом на право од гербу Републики Сербиї.

Член 12.

Жридловнїки (еталони) гербу и традиционалного гербу АП Войводини ше чува у Скупштини АП Войводини и по нїх ше оформює герб хтори ше хаснує.

Ґеометрийни конструкциї жридловнїка гербу и традиционалного гербу АП Войводини (чарно-била фарба, у фарби, линийова, комплетна конструкция и поєдинєчни конструкциї) ше находза у додатку хтори твори состойну часц тей одлуки.

Член 13.

Зоз пенєжну кару 100.000,000 динари ше покаре за потупенє правну особу кед:

- похаснує символи АП Войводини на способ на яки ше нарушує угляд и достоїнство АП Войводини,

- похаснує символи АП Войводини у иншаким змисту и форми од тих яки утвердзени з тоту одлуку,

- нє похаснує символи АП Войводини кед тото обовязне,

- похаснує очкодовани герб або традиционални герб АП Войводини, без одобреня похаснує герб або традиционални герб АП Войводини як амблем, знак, робни печац, услужни печац або як знак за означованє роби або услугох.

За потупенє зоз пасуса 1. того члена ше покаре и одвичательну особу у правней особи зоз пенєжну кару 15.000,00 динари.

За потупенє зоз пасуса 1. того члена ше покаре поднїмателя з пенєжну кару 50.000,00 динари, а физичну особу – з пенєжну кару 10.000,00 динари.

Член 14.

Покраїнска влада принєше упутство з яким ше блїжей ушори хаснованє символох АП Войводини, у складзе з тоту одлуку.

Член 15.

Печаци покраїнских орґанох и службох хтори снує АП Войводина ше усоглаши з тоту одлуку найпознєйше у чаше шейсц мешацох по ступаню на моц тей одлуки.

Член 16.

Видати леґитимациї посланїкох Скупштини АП Войводини и членох Покраїнскей влади ше усоглаши з тоту одлуку при першим заменьованю тих леґитимацийох, а найпознєйше при видаваню нових леґитимацийох.

Член 17.

Зоз ступаньом на моц тей одлуки престава важиц Покраїнска скупштинска одлука о хаснованю историйного символу Автономней Покраїни Войводини («Службени новини АПВ», число 10/2002 и 18/2009) и Покраїнска скупштинска одлука о застави Автономней Покраїни Войводини («Службени новини АПВ», число 2/2004 и 18/2009).

Член 18.

Тота одлука ступа на моц осми дзень по обявйованю у «Службених новинох Автономней Покраїни Войводини».

СКУПШТИНА АВТОНОМНЕЙ ПОКРАЇНИ ВОЙВОДИНИ

Нови Сад, 15. септембра 2016. року

ПРЕДСИДАТЕЛЬ
СКУПШТИНИ АП ВОЙВОДИНИ,

Иштван Пастор, с.р.