Покраїнскa скупштинска одлука о запровадзованю Статута Автономней Покраїни Войводини
("Сл. новини АП Войводини", число 20/2014)
На основи члена 34. алинея 2. и члена 41. пасус 2. алинея 2. Статута Автономней Покраїни Войводини («Службени новини АП Войводини», число 17/09),
Скупштина Автономней Покраїни Войводини, на схадзки хтора отримана 22. мая 2014. року, принєсла
ПОКРАЇНСКУ СКУПШТИНСКУ ОДЛУКУ
О ЗАПРОВАДЗОВАНЮ СТАТУТА АВТОНОМНЕЙ ПОКРАЇНИ ВОЙВОДИНИ
Член 1.
Статут Автономней Покраїни Войводини (у дальшим тексту: Статут) ше применює од дня ступаня на моц.
Член 2.
Скупштина Автономней Покраїни Войводини (у дальшим тексту: Скупштина АПВ) предлужує з роботу и окончує роботи у складзе з важацима предписанями.
Член 3.
Влада Автономней Покраїни Войводини предлужує з роботу и окончує роботи у складзе з важацима предписанями як Покраїнска влада.
Член 4.
Покраїнски омбудсман предлужує з роботу и окончує роботи у складзе з важацима предписанями як Покраїнски защитнїк гражданох – омбудсман.
Член 5.
Покраїнски орґани управи, служби, управи и други покраїнски орґанизациї предлужую з роботу и окончую роботи у складзе з важацима предписанями по їх ускладзованє зоз Статутом.
Член 6.
Покраїнски скупштински одлуки и други покраїнски предписаня оставаю на моци по їх ускладзованє зоз Статутом у терминох яки предвидзени зоз тоту покраїнску скупштинску одлуку, кед зоз тоту покраїнску скупштинску одлуку нє одредзене же преставаю важиц.
Член 7.
З дньом ступаня на моц тей покраїнскей скупштинскей одлуки престава важиц Покраїнска скупштинска одлука о Совиту националних заєднїцох («Службени новини АП Войводини», число 4/10).
Член 8.
Ускладзованє покраїнских предписаньох зоз Статутом ше окончи по 30. новембер 2014. року.
Покраїнски скупштински одлуки о Скупштини АПВ, о Покраїнскей влади, о покраїнскей управи, о Покраїнскому защитнїкови гражданох – омбудсманови и о випатрунку и хаснованю символох и традиционалних символох АП Войводини ше принєше найпознєйше у чаше трох мешацох од дня ступаня на моц тей покраїнскей скупштинскей одлуки.
Дїловнїк Скупштини АПВ и Дїловнїк Покраїнскей влади ше принєше найпознєйше у чаше 60 дньох од дня ступаня на моц покраїнских скупштинских одлукох зоз пасуса 2. того члена.
Други общи и поєдинєчни акти Скупштини АПВ и Влади Автономней Покраїни Войводини ше предлужує применьовац як общи и поєдинєчни акти Скупштини АПВ, односно Покраїнскей влади.
Член 9.
Покраїнска влада и Секретарият Покраїнскей влади предлужую по 31. децембер 2014. року вивершовац розходи яки плановани зоз Покраїнску скупштинску одлуку о буджету Автономней Покраїни Войводини за 2014. рок («Службени новини АП Войводини», число 50/13) у роздїлу под назву: «Влада Автономней Покраїни Войводини» и «Секретарият Влади Автономней Покраїни Войводини».
Покраїнски защитнїк гражданох – омбудсман предлужує по 31. децембер 2014. року вивершовац розходи яки плановани зоз Покраїнску скупштинску одлуку о буджету Автономней Покраїни Войводини за 2014. рок («Службени новини АП Войводини», число 50/13) у роздїлу под назву: «Покраїнски омбудсман».
Член 10.
Зоз дньом ступаня на моц тей покраїнскей скупштинскей одлуки престава важиц Покраїнска скупштинска одлука о запровадзованю Статута Автономней Покраїни Войводини («Службени новини АП Войводини», число 18/09).
Член 11.
Тота покраїнска скупштинска одлука ступа на моц осми дзень по обявйованю у «Службених новинох Автономней Покраїни Войводини».
СКУПШТИНА АВТОНОМНЕЙ ПОКРАЇНИ ВОЙВОДИНИ
Нови Сад, 22. мая 2014. року
ПРЕДСИДАТЕЛЬ
СКУПШТИНИ АП ВОЙВОДИНИ,
Иштван Пастор, с.р.
(Pásztor István, s.k.)