Покраїнскa скупштинска одлука о Покраїнским защитнїкови гражданох - омбудсманови
("Сл. новини АП Войводини", число 37/2014)
На основи члена 56. пасус 7. Статута Автономней Покраїни Войводини («Службени новини АПВ», число 20/2014),
Скупштинa Автономней Покраїни Войводини, на схадзки хтора отримана 23. септембра 2014. року, принєсла
ПОКРАЇНСКУ СКУПШТИНСКУ ОДЛУКУ О
ПОКРАЇНСКИМ ЗАЩИТНЇКОВИ ГРАЖДАНОХ - ОМБУДСМАНОВИ
I ОСНОВНИ ОДРЕДБИ
Член 1.
Зоз Покраїнску скупштинску одлуку о Покраїнским защитнїкови гражданох - омбудсманови (у дальшим тексту: Одлука) ше установює нєзависни и самостойни орґан Покраїнски защитнїк гражданох - омбудсман, ушорює ше компетенциї, поступок роботи того орґана, поступок вибераня и преставаня функциї покраїнского защитнїка гражданох - омбудсмана и заменїкох покраїнского защитнїка гражданох - омбудсмана и їх овласценя.
Член 2.
Шицки слова у тей одлуки хтори ґраматично родно опредзелєни, означую и одноша ше и на хлопски и на женски род.
Член 3.
Покраїнски защитнїк гражданох - омбудсман (у дальшим тексту: омбудсман) то нєзависни и самостойни орґан АП Войводини хтори щици права гражданох и надпатра роботу покраїнских орґанох управи, явних подприємствох и установох хтори окончую управни и явни овласценя, а чий снователь АП Войводина (у дальшим тексту: орґани управи), у вязи з їх поступаньом у вивершованю одлукох и других правних актох АП Войводини.
Омбудсман щици права гражданох окреме од потупеньох хтори з нєзаконїтим, нєдоцильним и нєефикасним поступаньом направя орґани управи.
Омбудсман щици права гражданох од потупеньох хтори з нєзаконїтим, нєдоцильним и нєефикасним поступаньом направя орґани городскей и општинскей управи у вивершованю роботох хтори им зверела АП Войводина зоз своєй жридловей компетенциї.
Член 4.
Омбудсман нєзависни и самостойни у окончованю роботох хтори утвердзени з тоту одлуку и нїхто нє ма право уплївовац на його роботу и поступанє.
Омбудсман ше стара о защити и унапредзеню людских и меншинских правох.
Омбудсман поступа у складзе з Уставом, потвердзенима медзинароднима контрактами и общеприлапенима правилами медзинародного права, законом и подзаконскима общима актами.
Основни принципи дїйствованя омбудсмана то законїтосц, нєпристрасносц, нєзависносц и справедлївосц.
Член 5.
Шедзиско омбудсмана ше находзи у Новим Садзе.
II ВИБОР И ПРЕСТАВАНЄ ФУНКЦИЇ
Член 6.
Функцию Покраїнского защитнїка гражданох - омбудсмана окончую покраїнски защитнїк гражданох - омбудсман (у дальшим тексту: омбудсман) и заменїки покраїнского защитнїка гражданох - омбудсмана (у дальшим тексту: заменїки омбудсмана).
Омбудсман, односно заменїк омбудсмана, нє може окончовац анї єдну другу явну або професионалну длужносц, буц член политичней орґанизациї, або ше занїмац з другу роботу хтора би могла уплївовац на його самостойносц и нєзависносц.
Омбудсман, односно заменїк омбудсмана, ше може винїмково занїмац зоз наукововиглєдовацку роботу, образовну або уметнїцку дїялносцу и обявйовац авторски дїла.
З дньом ступаня на длужносц омбудсмана, односно заменїка омбудсмана, преставаю шицки його професионални и други функциї, односно длужносци або роботи хтори по теди окончовал, кед су процивни одредбом тей одлуки, як и членство у политичних орґанизацийох.
Член 7.
Омбудсмана вибера и розришує Скупштина Автономней Покраїни Войводини (у дальшим тексту: Скупштина) зоз двотрецинску векшину гласох вкупного числа посланїкох.
Кандидата за омбудсмана можу предложиц найменєй 30 посланїки або скупштински одбор цо компетентни за питаня орґанизациї и роботи управи (у дальшим тексту: Одбор).
Омбудсмана ше вибера на шейсц роки и исту особу на тоту функцию мож виберац найвецей два раз єдно за другим.
Поступок за вибор омбудсмана почина найпознєйше два мешаци пред виходзеньом мандату предходного омбудсмана.
Омбудсман за свою роботу одвитує Скупштини.
Член 8.
Омбудсман ма штирох заменїкох, з хторих ше по єдного вибера за обласци: права националних меншинох, права дзецка и ровноправносц полох.
При виборе заменїкох ше водзи рахунку о ровномирней заступеносци обидвох полох и припаднїкох националних меншинох.
Заменїкох омбудсмана вибера Скупштина з векшину гласох вкупного числа посланїкох, на предкладанє омбудсмана.
Заменїкох омбудсмана ше вибера на шейсц роки и исту особу на тоту функцию мож виберац найвецей два раз єдно за другим.
Заменїки омбудсмана за свою роботу одвитую омбудсманови и Скупштини.
Член 9.
За омбудсмана може буц вибрани державян Републики Сербиї хтори виполнює шлїдуюци условия:
1) же є дипломовани правнїк,
2) же ма найменєй седем роки искуства на правних роботох хтори од значносци за окончованє роботох з компетенциї Омбудсмана,
3) же є нє осудзовани за виновне дїло на безусловну кару гарешту найменєй шейсц мешаци або за каребне дїло пре хторе є нєподобни за окончованє роботох у державним орґану,
4) же ма високи морални и фахово квалитети,
5) же ма замерковане искуство у защити правох гражданох.
Член 10.
За заменїка омбудсмана може буц вибрани державян Републики Сербиї хтори виполнює шлїдуюци условия:
1) же ма високу фахову приготовку,
2) же ма найменєй пейц роки искуства у обласци хтора од значносци за окончованє роботох з компетенциї Омбудсмана,
3) же є нє осудзовани за виновне дїло на безусловну кару гарешту найменєй шейсц мешаци або за каребне дїло пре хторе є нєподобни за окончованє роботох у державним орґану,
4) же ма високи морални и фахово квалитети,
5) же ма замерковане искуство у защити правох гражданох.
Член 11.
Пред ступаньом на длужносц, омбудсман и заменїки омбудсмана пришагаю пред Скупштину. Текст пришаги глаши: «Пришагам же свою длужносц будзем окончовац совисно, одвичательно, нєзависно и нєпристрасно и же свой труд унапрямим на унапредзенє и защиту людских правох, у складзе з Уставом и законом.»
Омбудсман и заменїки длужни ступиц на длужносц у чаше 30 дньох од дня вибору.
Кед омбудсман, односно заменїк омбудсмана, без оправданей причини нє ступи на длужносц у чаше 30 дньох од пришаганя, трима ше же є нє вибрани, цо Скупштина констатує на основи обвисценя хторе достанє од Одбору. У тим случаю ше такой порушує поступок за вибор нового омбудсмана, односно заменїка омбудсмана.
Член 12.
Функция омбудсмана и заменїка омбудсмана престава:
1) з виходзеньом мандату, кед ше го знова нє вибере,
2) у случаю шмерци,
3) зоз задзекованьом,
4) з траценьом державянства,
5) з виполнєньом условийох за пензию, у складзе зоз законом,
6) з наступаньом тирвацей физичней або менталней нєспособносци за окончованє функциї,
7) з розришеньом.
Причину за преставанє функциї зоз пасуса 1. того члена констатує Одбор и о тим обвисцує Скупштину.
У случаю преставаня функциї омбудсмана и заменїка омбудсмана пре причини яки наведзени у пасусу 1. точ. 1-6. того члена, Скупштина без розправи приноши одлуку з яку ше констатує здобуванє условийох за преставанє функциї.
Правни пошлїдки преставаня функциї наступаю од дня приношеня одлуки зоз пасуса 3. того члена.
Член 13.
Омбудсман, односно заменїк омбудсмана, може буц розришени од длужносци скорей як цо прейдзе час на хтори є вибрани кед:
1) нєфахово и нєсовисно окончує свою функцию,
2) окончує другу явну функцию або професионалну дїялносц, односно другу длужносц або роботу хтора може уплївовац на його самостойносц и нєзависносц, або кед поступа процивно закону з яким ше ушорює зоперанє зраженя интересох при окончованю явних функцийох,
3) будзе осудзени за виновне дїло пре хторе є нєподобни за окончованє тей функциї.
Омбудсман и заменїк омбудсмана ше маю право обрациц ґу покраїнским посланїком на схадзки Скупштини на хторей ше одлучує о їх розришеню.
Поступок за розришенє ше порушує на инициятиву Одбору або трецини посланїкох, а за розришенє заменїка омбудсмана и на инициятиву омбудсмана.
Одбор обвисцує Скупштину о тим же чи єст и яки то причини за розришенє.
Скупштина розришує омбудсмана або заменїка омбудсмана кед за розришенє гласала иста векшина посланїкох яка потребна за вибор омбудсмана, односно заменїка омбудсмана.
Член 14.
Омбудсман одредзує заменїка хтори го заменює у случаю його одсутносци або зопартосци же би окончовал роботи.
У случаю преставаня або розришеня омбудсмана, по виберанє нового, функцию омбудсмана окончує заменїк омбудсмана хторого омбудсман одредзел же би го заменьовал у случаю його одсутносци або зопартосци окончовац функцию.
Вибор нового омбудсмана ше окончи найпознєйше у чаше шейсцох мешацох од дня преставаня функциї скорейшого омбудсмана.
III ОВЛАСЦЕНЯ
Член 15.
Омбудсман овласцени контроловац почитованє людских правох, законїтосц, доцильносц, ефикасносц и правилносц у роботи орґанох управи у вязи з їх поступаньом у вивершованю одлукох и других правних актох АП Войводини и щициц права гражданох окреме од потупеньох яки з нєзаконїтим, нєдоцильним и нєефикасним поступаньом направя орґани управи. Омбудсман щици права гражданох и од потупеньох яки з нєзаконїтим, нєдоцильним и нєефикасним поступаньом направя орґани городскей и општинскей управи у вивершованю роботох хтори им АП Войводина зверела зоз своєй жридловей компетенциї.
Член 16.
Омбудсман провадзи процеси приношеня покраїнских предписаньох и вименки и дополнєня важацих, у шицких обласцох витворйованя людских правох.
Омбудсман ма право предкладац покраїнски скупштински одлуки и други общи акти хтори приноши Скупштина зоз своєй компетенциї, окреме кед трима же до потупйованя права гражданох приходзи пре нєдостатки у предписаньох.
Омбудсман овласцени у поступку пририхтованя предписаньох Покраїнскей влади и Скупштини дац думанє и препоруки у вязи зоз предлогами одлукох, кед ше з нїма ушорює питаня од значносци за защиту правох гражданох.
Член 17.
Омбудсман континуовано надпатра и провадзи применку медзинародних контрактох, стандардох и предписаньох з обласци людских правох и на основи призбераних информацийох предклада мири за злєпшанє стану у обласци защити и унапредзеня людских правох.
Член 18.
Омбудсман запровадзує виглєдованя пре увид до стану людских правох, идентификованє проблемох и формулованє препорукох за витворйованє, защиту и унапредзенє людских правох.
Член 19.
Омбудсман овласцени информовац гражданох о предписаньох и давац правни совити о можлївосцох за витворйованє їх правох, упутиц подношителя притужби на порушованє одвитуюцого правного поступку пред компетентнима орґанами, кед таки поступок предвидзени.
Член 20.
Омбудсман овласцени явно препоручиц розришенє функционера хтори одвичательни за потупенє правох гражданох, односно иницировац порушованє поступку за утвердзованє одвичательносци занятого у орґану управи хтори нєпоштредно одвичательни за направене потупенє.
Кед у роботи функционера або занятого у орґану управи пренайдзе елементи виновного або другого каребного дїла, омбудсман овласцени поднєсц вимаганє компетентному орґану, односно прияву за порушованє виновного, потупового або другого одвитуюцого поступку.
Член 21.
Омбудсман подноши Скупштини рядови рочни звит у хторим ше наводза податки о активносцох у предходним року, податки о замеркованих нєдостаткох у роботи орґанох управи, дава общу оцену роботи орґанох управи зоз становиска применки предписаньох, як и предкладаня за злєпшанє положеня гражданох у одношеню на орґани управи.
Звит облапя податки о чишлє и структури притужбох, замерковани препущеня и препоруки за їх одстраньованє, як и критики и похвали дзепоєдним орґаном управи и функционером.
Звит ма окремни часци за обласци правох националних меншинох, правох дзецка и правох по основи ровноправносци полох. Окремни часци звиту составяю заменїки омбудсмана.
Звит о роботи ше подноши найпознєйше по 31. марец за предходни рок и обявює на урядовим интернет боку Покраїнского защитнїка гражданох - омбудсмана.
На вимаганє омбудсмана, Скупштина положи на дньови шор звит зоз пасуса 1. того члена и будзе розправяц о нїм.
Омбудсман може участвовац у розправи о звиту.
Член 22.
Омбудсман може поднєсц окремни звит Скупштини, кед оценї же то вимагаю окреме важни причини або кед Скупштина вимага од нього таки звит.
Окремни звит ше обявює на урядовим интернет боку Покраїнского защитнїка гражданох - омбудсмана.
Член 23.
Омбудсман обвисцує компетентни орґани и ширшу явносц о потупйованю людских правох и видава сообщеня о потупйованю правох гражданох.
Член 24.
Омбудсман орґанизує совитованя и кампанї у обласци образованя о людских правох и питаньох од значносци за витворйованє людских правох и участвує у їх роботи.
Член 25.
Омбудсман овласцени порушац пред Уставним судом поступок за оцену уставносци и законїтосци законох, других предписаньох и общих актох.
Член 26.
Омбудсман ма право присуствовац на шицких схадзкох Скупштини и скупштинских одборох и право участвовац на скупштинскей розправи кед ше розправя о питаньох з його компетенциї.
Член 27.
Омбудсман сотрудзує и чера искуства з другима омбудсманами у жеми и иножемстве и може буц член домашнїх и медзинародних здруженьох омбудсманох.
Член 28.
Омбудсман сотрудзує зоз Защитнїком гражданох Републики Сербиї у окончованю роботох Националного механїзму за превенцию тортури и поряднє нащивює места дзе ше находза особи цо позбути шлєбоди, пре превенцию тортури и других нємилосердних нєлюдских або понїжуюцих карох и поступкох.
Член 29.
Заменїк омбудсмана за права националних меншинох щици права националних меншинох и овласцени є контроловац роботу орґанох управи у обласцох витворйованя и унапредзованя правох националних меншинох.
Заменїк омбудсмана за права дзецка щици права дзецка и овласцени є контроловац роботу орґанох управи у обласцох витворйованя и унапредзованя правох дзецка.
Заменїк омбудсмана за ровноправносц полох щици гражданох по основи ровноправносци полох и овласцени є контроловац роботу орґанох управи у витворйованю и унапредзеню ровноправносци женох и хлопох.
Овласценя зоз чл. 15-18. ше одноша и на заменїкох омбудсмана, у рамикох їх обласци роботи.
Член 30.
Омбудсман окончує и други роботи, у складзе зоз законом, одлуками и другима актами Скупштини.
IV ПОСТУПОК
Член 31.
Омбудсман порушує поступок по притужби гражданох або по власней инициятиви, на основи спознаньох з других жридлох, кед оценї же постої або же постояло потупенє правох гражданох з боку орґанох управи.
Под поняцом граждан, у смислу тей одлуки, подрозумює ше физичну особу хтора домашнї державян и кажду физичну особу хтора странски державян, як и кажду домашню або странску правну особу о чиїх правох и обовязкох одлучую орґани управи зоз члена 3. тей одлуки.
Омбудсманови ше у мено физичней особи може обрациц и законски заступнїк, полномоцнїк и овласцена особа орґана старательства, а кед ше роби о потупеню правох правней особи, особа цо овласцена за заступанє тей правней особи. У мено и зоз согласносцу особи чийо право потупене, притужбу може поднєсц и орґанизация цо ше занїма зоз защиту людских правох або друга особа.
Член 32.
Притужбу мож поднєсц найпознєйше у чаше єдного року од зробеного потупеня правох гражданох, односно остатнього поступаня, або препущеня орґана поступиц у вязи зоз зробеним потупеньом правох гражданох.
Винїмково, омбудсман може поступац по притужби и после виходзеня того термину у случаю же преценї же ше роби о чежшей форми потупеня людских правох.
Член 33.
Условиє за порушованє поступку тото же подношитель пред подношеньом притужби пробовал защициц свойо права у одвитуюцим правним поступку и же вичерпани шицки правни средства, односно же нєт правне средство за одстраньованє потупеня на яке подношитель указує.
У случаю же нє виполнєне условиє зоз пасуса 1. того члена, Омбудсман упуци подношителя притужби на порушованє одвитуюцого правного поступку, кед таки поступок предвидзени и нє будзе порушовац поступок док нє ше нє вичерпаю шицки правни средства.
Винїмково, омбудсман може порушац поступок и кед подношитель нє пробовал защициц свойо права, односно и пред тим як цо вичерпани шицки правни средства, кед ше притужбу подноши пре нєзаконїту роботу, нєпочитованє началох и правилох управного поступку, нєпочитованє правилох етичного справованя и нєприкладного справованя занятих ґу гражданом.
Член 34.
Омбудсман нє поступа по анонимних притужбох.
Винїмково, кед ше трима же у анонимней притужби єст основи за поступанє, омбудсман може порушац поступок по власней инициятиви.
На вимаганє подношителя притужби, у случайох хтори окреме оправдани, омбудсман нє муши орґану управи одкриц идентитет подношителя притужби.
Член 35.
Притужбу ше подноши у писаней форми, уключуюци шицки способи електронскей комуникациї, без окреме утвердзеней форми и вона нє подпада под плаценє такси або надополнєня.
Винїмково, представку мож виявиц и усно на записнїк.
Особи цо позбути шлєбоди маю право поднєсц представку у запечацованей коверти. Особи хтори заняти у установох дзе ше находза особи цо позбути шлєбоди маю обовязку, без отвераня и затримованя, представку загарештованей особи такой доручиц омбудсманови.
Член 36.
Притужба ма назву орґана на чию ше роботу одноши, опис потупеня правох, факти и докази на яких ше притужбу снує, податки о тим хтори правни средства вихасновани и податки о подношительови притужби.
Член 37.
Омбудсман длужен поступиц по каждей притужби окрем кед:
1) предмет, на хтори ше одноши притужба, нє спада до компетенциї Омбудсмана,
2) притужба поднєшена после виходзеня термину за подношенє, а нє виполнює условиє зоз члена 32. пасус 2. тей одлуки,
3) притужба поднєшена пред тим як цо вихасновани шицки розполагаюци правни средства, а нє виполнює условия зоз члена 33. пасус 3. тей одлуки,
4) притужба анонимна, а нє виполнює условия зоз члена 34. пасус 2. тей одлуки,
5) у притужби нєт потребни податки за поступанє, а подношитель тоти нєдостатки нє одстранєл анї у дополнююцим термину яки одредзени за дополньованє притужби.
Кед омбудсман оценї же нєт основи за поступанє, о тим обвисцує подношителя притужби и обгрунтує причини за нєпоступанє.
У случаю же подношитель притужби одступи од притужби, поступок ше застанови. Винїмково, поступок ше предлужи кед ше притужбу подноши пре нєзаконїту роботу, нєпочитованє началох и правилох управного поступку, нєпочитованє правилох етичного справованя и нєприкладного справованя занятих ґу гражданом.
Член 38.
О порушованю и законченю поступку омбудсман обвисцує подношителя притужби, як и орґан управи на чию ше роботу притужба одноши.
Член 39.
Орґан управи обовязни одвитовац на шицки вимаганя омбудсмана и доручиц му шицки вимагани информациї и списи у чаше яки вон одредзи, а хтори нє може буц кратши як 5 днї анї длугши як 15 днї.
Орґани управи маю обовязку сотрудзовац зоз омбудсманом и оможлївиц му приступ до просторийох и положиц на розполагованє шицки податки з якима розполагаю, а хтори од значносци за поступок хтори водзи, односно за витворйованє цилю його превентивного дїйствованя, без огляду на ступень їх тайносци, окрем кед тото у процивносци зоз законом.
Омбудсман ма право окончиц розгварку з каждим занятим у орґану управи, кед то значне за поступок хтори водзи.
Омбудсман и заменїки омбудсмана длужни и по преставаню функциї чувац тайносц податкох хтори достали у окончованю функциї.
Обовязку чуваня тайносци маю и заняти у Фаховей служби Покраїнского защитнїка гражданох - омбудсмана.
Член 40.
Функционере и руководителє у орґанох управи длужни прияц омбудсмана на його вимаганє найпознєйше у чаше 8 дньох по посиланю вимаганя у писаней форми.
Член 41.
Кед орґан управи процив хторого ше поднєсло притужбу сам одстранї нєдостатки под час тирваня поступку, омбудсман о тим обвисци подношителя притужби и застанови поступок.
Член 42.
По утвердзованю шицких релевантих фактох и околносцох омбудсман може обвисциц подношителя притужби же притужба нєоснована або може утвердзиц же було нєправилносци у роботи орґана управи.
Кед оценї же було нєправилносци у роботи орґана управи, омбудсман тому орґану доручує думанє.
Кед оценї же було таки нєправилносци, односно пошлїдки нєправилносцох яки мож одстранїц, омбудсман орґану зоз думаньом доручи и препоруку о тим як одклонїц нєправилносц, односно пошлїдки тей нєправилносци.
Орґан управи длужни, найпознєйше у чаше 15 дньох по доставаню думаня або препоруки, обвисциц омбудсмана о поднятих мирох.
Кед орґан управи нє поступи по препоруки, омбудсман о тим може обвисциц явносц, нєпоштредни висши орґан, Скупштину, Покраїнску владу односно општинску/городску раду.
Член 43.
Одредби чл. 29-42. тей одлуки сходно ше применює и на поступок хтори омбудсман порушал по власней инициятиви.
Член 44.
Окрем права на порушованє и водзенє поступку, омбудсман ма право и превентивно поштредовац и давац совити и думаня о питаньох зоз своєй компетенциї, пре унапредзенє роботи орґанох управи и унапредзенє защити людских правох и шлєбодох.
V ФАХОВА СЛУЖБА И СРЕДСТВА ЗА РОБОТУ
Член 45.
Омбудсман формує фахову службу за окончованє фахових и административно-технїчних роботох.
Зоз фахову службу руководзи директор служби.
Омбудсман поставя и розришує директора фаховей служби.
Омбудсман може одлучиц дзепоєдним фаховим сотруднїком звериц одредзени овласценя хтори буду окончовац у його мено.
На директора и занятих у фаховей служби ше применює предписаня о роботних одношеньох и плацох у покраїнских орґанох.
Омбудсман приноши одлуки о снованю и преставаню роботного одношеня занятих и витворйованю правох зоз роботного одношеня.
Член 46.
Омбудсман ма право на плацу у висини плаци покраїнского секретара хтора звекшана за 20%, а заменїки омбудсмана у висини плаци заменїкох покраїнского секретара хтора звекшана за 20%.
Член 47.
Омбудсман и заменїки витворюю права по основи роботи, у складзе зоз предписанями о роботних одношеньох у покраїнских орґанох.
Член 48.
Омбудсман приноши Дїловнїк о роботи и акт о нукашнєй орґанизациї и систематизациї роботних местох у Фаховей служби Покраїнского защитнїка гражданох - омбудсмана.
Акт о нукашнєй орґанизациї и систематизациї фаховей служби ше приноши з предходно прибавеним думаньом Одбору.
Член 49.
Средства за роботу омбудсмана ше обезпечує у буджету АП Войводини.
Обсяг и структуру средствох предклада омбудсман.
VI ПРЕХОДНИ И ЗАКОНЧУЮЦИ ОДРЕДБИ
Член 50.
После приношеня тей одлуки омбудсман и заменїки омбудсмана предлужую з роботу по виходзенє термину на яки су вибрани.
Поступки хтори по ступанє на моц тей одлуки нє закончени, законча ше по одредбох тей одлуки.
Омбудсман длужен у чаше 30 дньох по ступаню на моц тей одлуки, усоглашиц Дїловнїк о роботи и акт о нукашнєй орґанизациї и систематизациї роботних местох.
Член 51.
Зоз ступаньом на моц тей одлуки престава важиц Покраїнска скупштинска одлука о Покраїнским омбудсманови («Службени новини АПВ», число 23/02, 5/04, 16/05, 18/09-пременка назви акта).
Член 52.
Тота одлука ступа на моц осми дзень по обявйованю у «Службених новинох Автономней Покраїни Войводини».
СКУПШТИНА АВТОНОМНЕЙ ПОКРАЇНИ ВОЙВОДИНИ
Нови Сад, 23. септембра 2014. року
ПРЕДСИДАТЕЛЬ
СКУШТИНИ АП ВОЙВОДИНИ,
Иштван Пастор, с.р.
(Pásztor István, s.k.)