Нови Сад, 31. януар – Предсидатель Скупштини АП Войводини Балинт Югас присуствовал нєшка на означованю 106. рочнїци од снованя Привредней комори Войводини, як и на додзельованю наградох „Коста Миросававлєвич“ найуспишнєйшим привредним дружтвом и поєдинцом.
Привитуюци присутних, предсидатель Югас наглашел же Привредна комора Войводини уж длужей од єдного вику пошвецено доприноши економскому просперитету АП Войводини и цалей Републики Сербиї. Вон здогаднул на 1919. рок кед основана тедишня Тарґовинско-индустрийна и ремеселска комора, оценююци же ше индустриялцом, тарґовцом и ремеселнїком з подруча нєшкайшей Войводини у виволуюцих часох удало превозисц знаня и обставини свойого часу.
„Привредна комора Войводини обстала як дїловно-фахова орґанизация у осем розличних державно-правних формох, а привреднїки з тих просторох вше мали моци прилагодзиц ше новому историйному часу“, гварел Югас.
Вон наглашел же у периодзе януар-юний 2024. року на тарґовище ЕУ пласоване 72,2 проценти вкупного войводянского вивозу и же тот тренд намаганя ґу тарґовищу ЕУ провадзи и одлука Привредней комори Войводини же би ше придружела Федерациї дунайских привредних коморох.
Предсидатель Привредней комори Войводини Владимир Ґак наглашел же тота институция пестує традицию и здобутки хтори нашлїдзела од предкох та є нєшка на услуги привреди зоз цильом же би вєдно зоз привреднїками була креатор ище лєпшого и успишнєйшого дїлованя.
„Циль нам у наступним периодзе отвориц нови тарґовища и нови алати у функционованю комори хтори лєпше препознаваю потреби привреди“, гварел Ґак.
Присутних привреднїкох привитали и Ненад Иванишевич, покраїнски секретар за привреду и туризем и Предраґ Петрович, ґенерални секератар Привредней комори Сербиї.
Награди „Коста Миросавлєвич“ за тот рок уручени привредним дружтвом „АТБ Сивер доо“ зоз Суботици, Индустриї меса „Дюрдєвич“ зоз Суботишта при Печинцох, як и поєдинцом: поднїмательки Зорици Радишич (Фармер сир, Чуроґ) и проф. др Миланови Убавичови (Медлаб, винария Винум). Припознанє Златне пирко привреди уручене редакциї порталу „Войводина директно“.