Нови Сад, 11. април – Предсидатель Скупштини АП Войводини Балинт Югас бешедовал нєшка зоз представнїком Федеративней униї европских меншинох (ФУЕН) Йоханом Гаґманом о значносци заступаня меншинских заєднїцох през институциї и орґанизациї.
На схадзки заключене же ФУЕН окончує барз важну роботу на защити меншинских правох прейґ сотруднїцтва зоз културнима и образовнима институциями ширцом Европи, як и же робота тей орґанизациї остатнїх рокох додатно змоцнєна и обачлївша.
«Задовольство ми же будземе сотрудзовац на защити и моцнєню меншинских правох, а окреме ме радує же наступни, 9. Форум ФУЕНА, на тему «Додатна вредносц меншинох у прейґгранїчних реґионох», будзе отримани праве у Скупштини АП Войводини, од 26. до 28. юния, визначел Югас и додал же окремни акцент тей конференциї будзе на представяню Войводини и єй специфичносцох и потенциялох.
Югас и Гаґман бешедовали и о значносци яку маю национални заєднїци як мост хтори повязує держави у хторих жию и матичних державох, цо резултує и з моцнєньом привредного и другого сотруднїцтва медзи тима жемами.
Югас наглашел и же Република Сербия и АП Войводина приклад добрей пракси кед слово о законодавним рамику у обласци защити и унапредзеня правох националних заєднїцох, насампредз визначуюци Закон о националних совитох националних меншинох.
ФУЕН найвекша орґанизация за заступанє интересох автохтоних националних меншинох и язичних заєднїцох у Европи, хтора зазберує вецей як 100 членїци зоз 38 державох.