Нови Сад, 7. май – Предсидатель Скупштини АП Войводини Балинт Югас, вєдно зоз подпредсидателями Александру Малетич, Миланом Суботином и Борисом Новаковичом бешедовал нєшка зоз делеґацию нємецкей Союзней покраїни Гесен, хтору предводзел министер за федерални, медзинародни и европски роботи и дебирократизацию Манфред Пенц.
У сердечней розгварки визначена значносц потерашнього сотруднїцтва двох покраїнох, як и моцна опредзелєносц же би ше воно у наступним периодзе ище унапредзело, насампредз у обласцох парламентарного, економского и технолоґийного сотруднїцтва.
«Войводина Европа у малим – мултикултурална, вецейязична и отворена. Горди зме на тото же зме, после Европского парламенту, найвецейязични парламент у Европи. Прето нам мило же зоз партнерами як цо то Гесен можеме дзелїц визию о заєднїцким проґресу», визначел Югас.
Министер Пенц наглашел же Гесен барз заинтересовани за моцнєнє сотруднїцтва зоз АП Войводину, през привредни активносци алє и през стратеґийне моцнєнє парламентарних одношеньох. Вон предложел же би оперативни тими двох парламентох прецизовали и формовали документ же би ше нормативно змоцнєло повязованє двох парламентох, а у хторим би ше детально утвердзели модели и обласци за будуце моцнєнє и ширенє партнерства Войводини и Гесену.
На сходу розпатрани и инвестицийни потенциял Войводини, можлївосци черанки искуствийох у обласци дуалного образованя, як и сотруднїцтво у обласци ИТ индустриї у хторих обидва покраїни маю виражени розвойни напрям.
«Тота нащива представя ясни сиґнал же и АП Войводина и Гесен жадаю моцнєйше и змистовнєйше сотруднїцтво и радуєме ше шицким будуцим проєктом хтори ше будзе реализовац през тото партнерство», заключел Югас.
На сходу були присутни и ґенерална секретарка Скупштини АП Войводини Сандра Стойкович, як и члени Одбору за европски роботи и нукашнї роботи парламенту Гесену – Стефан Шнайдер, Їрґен Фремрих, Матияс Биґер и Ридиґер Голшух.