Нови Сад, 21. май – Предсидатель Скупштини АП Войводини Балинт Югас, вєдно зоз директором Новосадского сайму Слободаном Цветковичом, нащивел нєшка 92. Медзинародни польопривредни саям у Новим Садзе, а у рамикох нєшкайшей саямскей програми, отворел Конференцию ”Интелиґентни ришеня за польопривредних поднїмательох”, хтору орґанизовала Штредньоевропска мрежа за економски розвой (CED).
Предсидатель Югас и директор Цветкович нащивели штанд Покраїнскей влади и Покраїнского секретарияту за польопривреду, Министерства польопривреди, Городскей управи за привреду городу Нового Саду, Штредньоевропскей мрежи за економски розвой (CED) подприємства KITE d.o.o. (заступнїка John Deer механїзациї за Сербию) и други.
У вияви за медиї, предсидатель Югас визначел же Медзинародни польопривредни саям у Новим Садзе найзначнєйша манифестация польопривредней и поживовей индустриї у цалим реґионє и наглашел же вона нє лєм викладбени простор, алє место стретнуца традициї, иновациї, знаня и технолоґиї, науки и пракси.
”Ту ше нє презентує лєм машини и продукти, алє ту наставаю идеї, партнерства и пише будучносц нашей польопривреди. Даєдни твердза же саямски манифестациї превозидзени, медзитим, тота манифестация тото демантує зоз велїма конкретнима прикладами, та прето думам же барз важне тоту традицию и после 92 рокох предлужиц”, поручел Югас. Вон подзековал тогорочней жеми партнерови Италиї на уложеним труду и презентациї своїх праксох з обласци зєдиньованя ИТ индустриї, штручней интелиґенциї и польопривреди. 
Директор Новосадского сайму Слободан Цветкович визначел длугорочну традицию нащиви предсидателя покраїнского парламенту Польопривредного саяму и подзековал предсидательови Югасови же тоту традицию предлужел. Вон гварел же предходно з предсидательом Югасом бешедовал о напряме у яким ше ма рушац политика у обласци польопривреди. Цветкович визначел и же Мадярска, окрем того же була жем партнер Польопривредного сайму, традиционално присутна зоз вельким числом компанийох и же потримує дальши розвой польопривреди у Войводини.
Заменїк покраїнского секретара Золтан Тот визначел же тота манифестация нє лєм традиция алє символ иновацийох и сотруднїцтва хторе з рока на рок зазберує найважнєйших актерох аґрарного сектору, та так и нєшка, кед ше у духу партнерства бешедує о иновацийох, спокусох и заєднїцких наступох.
По обиходу Польопривредного сайму, предсидатель Югас отворел Конференцию ”Интелиґентни ришеня за польопривредних поднїмательох”, хтору орґанизовала Штредньоевропска мрежа за економски розвой (CED), хтора уж роками орґанизує на Польопривредним саяме конференциї о шицких актуалних питаньох и иновацийох з обласци привреди и аґрару.
”Конференция хтору орґанизує Аґенция CED постава синоним и сиґурне место за мадярско-сербске привредне сотруднїцтво, хторе лоґични шлїд добрих одношеньох Сербиї и Мадярскей, хтори тераз на историйней вершини. Думам же за обидва держави барз важне тоти одношеня пренєсц на язик економиї и привреди на взаємни хасен”, гварел Югас отвераюци Конференцию.
Здогаднул присутних на час кед Мадярска нє була анї у перших дзешец вонкашньотарґовинских партнерох Сербиї, вец вошла до перших дзешец, а тераз є у Войводини треци, а у Сербиї штварти вонкашньотарґовински партнер. Югас визначел же вонкашньотарґовинска черанка медзи Сербию и Мадярску перши три мешаци у тим року виношела милиярду евра, цо вельо вецей як у прешлим року и указатель є же зме на добрей драги.
”Барз важна и тема конференциї, применьованє нових технолоґийох и штучней интелиґенциї у польопривреди. Кед вежнєме до огляду же Войводина польопривредни реґион, Нови Сад ИТ центер Сербиї, же маме Биосенс институт як пионира у таких подняцох и першу диґиталну фарму у Бачкей Тополї, тото нам гутори же и ми можеме понукнуц приклади добрей пракси нашим партнером з Мадярскей”, поручел Югас.
На Конференциї присуствовали и представителє Новосадского сайму, Мадярскей амбасади и конзулату у Суботици, Покраїнского секретарияту за польопривреду, Штредньоевропскей мрежи за економски розвой (CED), представителє компанийох и други.