Рабе/Нови Сад, 31. мая – Предсидатель Скупштини АП Войводини Балинт Югас присуствовал нєшка на шветочней церемониї отвераня тройнїстей гранїци медзи Републику Сербию, Мадярску и Румунию, у орґанизациї Реґионалного сотруднїцтва Дунай – Криш – Мориш – Тиса (ДКМТ).
У складзе зоз деценийну традицию, ДКМТ орґанизує отверанє тей гранїци каждей остатнєй соботи у маю, як символ твардого сотруднїцтва и приятельства з нука ДКМТ мрежи, зоз присуством найвисших урядових особох ДКМТ у реґиону.
По шветочносци, предсидатель Скупштини АП Войводини Балинт Югас визначел значенє отвераня гранїчного преходу медзи Рабеом и Майданом цо є отворени 2019. року, як и важносц же би гранїци нє були препреченя, ялє место повязованя.
«Тромеджа найлєпши приклад кельо важне же би гранїци мали преходносц. Отверанє преходу принєсло конкретни хасен за жительох Рабеа и Майдану, а тото указує и яку значносц би мало кед би Сербия була часц Шенґену, як цо то од 1. януара постала Румуния», гварел Югас и додал же у взаємним интересу же би ше гранїци медзи Сербию, Мадярску и Румунию додатно отворели и присподобели потребом гражданох.
Югас здогаднул же ше у рамикох ДКМТ евро-реґиї уж три децениї успишно реализує заєднїцки проєкти и визначел же
природни зявеня як цо то суши и водоцекох нє познаю гранїци, и же заєднїцке дїйствованє у прейґгранїчних проєктох маю сущну значносц за шицких.
Шветочносц орґанизована при памятнїку «Triplex Confinium» (тройнїста гранїца), каменю гранїчнїку на тромеджи, хтори представя моцни символ зложеней историї, културней рижнородносци и интезивного сотруднїцтва медзи трома жемами. На шветочносци бешедовали покраїнски секретар за реґионални розвой, медиреґионалне сотруднїцтво и локалну самоуправу Александар Софич, предшедаюци ДКМТ и подпредсидатель Самоуправи жупаниї Бач-Кишкун др Корнел Мака и предсидатель Совиту жупаниї Тимиш Алфред Роберт Симонс.
Як и каждого року, пририхтана богата културна и спортска програма, а отримане и символичне обегованє учашнїкох зоз трох державох, дзецох зоз трох валалох цо су блїзко тромеджи, валала Раби, Киберхази и Баба Веки, а по тим им придати награди.