Нови Сад, 3. юний – Предсидатель Скупштини АП Войводини Балинт Югас бешедовал нєшка зоз делеґацию Здруженя неурохирурґох Сербиї (ЗНХС) о предстояцим рочним медзинародним конґресу того фаховного здруженя, хтори ше од 23. по 26. октобер отрима у Новим Садзе.
Проф. др Лукас Расулич и проф. др Дюла Дїлвеси упознали предсидателя Югаса зоз традицию и значносцу того рочного сходу зоз медзинародну учасцу, хтори ЗНХС орґанизує у сотруднїцтве зоз Здруженьом неурохирурґох Юговосточней Европи, Здруженьом неурохирурґох Турскей и Секцию за етично-леґални питаня Европскей асоцияциї неурохирурґийних здруженьох.
Предсидатель Югас визначел же велька чесц же Нови Сад по други раз будзе домашнї такого реномованого науково-фахового сходу и наглашел же покраїнска администрация у подполносци потримує орґанизованє Конґресу.
„Отримованє медзинародного конґресу неурохирурґох у Новим Садзе представя припознанє за наш здравствени, наукови и академски статус и потенциял. Тот сход будзе нагода за черанку найновших знаньох, алє и за повязованє фаховцох хтори формую будучносц сучасней медицини. Прешвечени сом же конґрес да додатну стимулацию и розвою локалней заєднїци, як и дальшому моцнєню здравственей системи у Войводини. Покраїнска Скупштина предлужи буц сиґурни партнер фаховим и науковим институцийом, бо лєм зоз заєднїцкима моцами можеме будовац здравше, одвичательнєйше и просперитетнєйше дружтво“, поручел предсидатель Югас.
Собешеднїки визначели же тема тогорочного конґресу „Етично-леґални аспекти неурохирурґиї у 21. вику: спокуси и можлївосци“, зоз цильом зазберованя водзацих домашнїх, европских и шветових фаховцох, же би ше розпатрало ключни етични и правни питаня хтори формую сучасну неурохирурґийну праксу, уключуюци и спокуси хтори зоз собу приноши вше векши уплїв штучней интелиґенциї до шицких обласцох.
На Конґресу буду участовац вершински фаховци зоз обласци неурохирурґиї – представителє водзацих домашнїх и шветових клинїкох, институтох и фахових асоцияцийох. Окрем науковей и фаховей значносци, подїя претендує през едукацию и умрежованє допринєсц и ґу економскей активносци и промоциї култури и потенциялох Нового Саду и АП Войводини.