Нови Сад, 24. юний - Предсидателька Покраїнскей влади Мая Ґойкович и предсидатель Скупштини Автономней покраїни Войводини Балинт Югас отримали нєшка порядну схадзку пошвецену дальшому сотруднїцтву покраїнских институцийох у реализациї стратеґийних проєктох од значносци за гражданох и привреду Войводини.
Предсидателька Ґойкович и предсидатель Югас бешедовали о темох ютрейшей схадзки Скупштини АП Войводини, хтори облапяю ключни аспекти управяня и розвою Покраїни - од закончуюцого рахунку покраїнского буджету, прейґ вименкох и приношеньох просторних планох за подруча окремней наменки, по значни инфраструктурни, еколоґийни и културни проєкти. Окремну повагу ше пошвеци и звитом о дїлованю покраїнских институцийох, пре унапредзенє транспарентносци и ефикасносци явней управи.
У розгварки визначена значносц континуованого сотруднїцтва медзи Покраїнску владу и Скупштину АП Войводини, пре витворйованє приоритетних цильох розвою Покраїни. Оценєне же потерашнє сотруднїцтво дало обачлїви резултати, окреме у обласци реализациї инфраструктурних и социялних проєктох, а виражена и двобочна порихтаносц за єй дальше преглїбйованє и унапредзованє.
Схадзка отримана у конструктивней атмосфери, зоз заєднїцку оцену же институционална стабилносц и партнерске одношенє представяю ключ за унапредзенє квалитету живота шицких гражданох Войводини.