27. 06. 2025.Югас: Войводина горди домашнї FUEN конференциї

Нови Сад, 27. юний – У Скупштини АП Войводини нєшка отворена дводньова конференция на тему «Економске доприношенє меншинских заєднїцох у прейґгранїчних реґионох», хтору орґанизує Федерация европских националних меншинох (Federal Union of European Nationalities – FUEN). 

Конференцию отворел предсидатель Скупштини АП Войводини Балинт Югас хтори визначел же АП Войводина горди домашнї тей конференциї. Вон гварел же автентични национални заєднїци ключни фактор у очуваню европскей рижнородносци и реґионалного розвою. Югас наведол и же Войводина препозната як идеални домашнї и реґион у хторим жию вецей як 26 национални заєднїци, шейсц язики ше службено хаснує, цо представя добри приклад мултикултуралносци и институционалней потримовки меншином.

«Войводина доказ же национални заєднїци можу успишно очувац свой идентитет и активно допринєсц розвою дружтва у цалосци, як и же мултикултуралносц нє спокуса алє предносц. Нєшка зоз гордосцу представяме резултати нашей роботи и посиламе ясне порученє же национални заєднїци нє вимагаю привилеґиї, ялє нагоду же би допринєсли и були мост сотруднїцтва медзи державами и порушовачи реґионалного розвою», гварел предсидатель Югас.

Народни посланїк и предсидатель Союзу войводянских Мадярох, як соорґанизатор тей конференциї, Балинт Пастор визначел же Сербия, а насампредз Войводина, ма цо понукнуц Европи кед слово о моделох успишного сотруднїцтва медзи векшинским народом и националнима меншинами. Як ключни резултат вон видвоєл историйне помиренє медзи сербским и мадярским народом, яке посцигнуте през политични диялоґ.

«Жадаме указац Европи як ше будує партнерство медзи векшину и меншинами. Сербия и Мадярска нєшка маю историйно найлєпши одношеня, цо резултат диялоґу и довирия яки зме роками будовали», гварел Пастор додаваюци же таки одношеня резултат сотруднїцтва войводянских Мадярох зоз матичну державу.

Посланїк у Европским парламенту и предсидатель FUEN Лорент Винце наглашел же тото першираз же ше єдну зоз найзначнєйших подїйох ФУЕН отримує звонка териториї Европскей униї.

«Жадали зме указац же и звонка гранїцох ЕУ можлїве витвориц успишне сотруднїцтво и очувац културни идентитет националних заєднїцох. Войводина єден з найлєпших прикладох такей пракси», гварел предсидатель FUEN.

Городоначалнїк Нового Саду Жарко Мичин визначел же за город, алє и за Републику Сербию, велька чесц же є домашнї такому значному сходу представнїкох меншинских заєднїцох зоз цалей Европи. Вон наглашел же Нови Сад мултикултурални город хтори виками нашлїдзує почитованє розличносци и медзисобного почитованя и уважованя, а же национални заєднїци важни слуп економского и културного проґресу нашей жеми. 

У мено Влади Републики Сербиї, учашнїком бешедовал и Усаме Зукорлич, министер без портфелю задлужени за обласц помиреня, реґионалного сотруднїцтва и дружтвеней стабилносци. Министер визначел важносц такого сходу и теми економского и политичного доприношеня националних заєднїцох за просперитет державох у хторих жию, визначуюци же слово о стратеґийно важним ресурсу.

Присутних госцох и учашнїкох конференциї привитали и представнїк Делеґациї ЕУ у Сербиї Ричард Маша и Желяна Зовко, членїца Комитету за вонкашню политику и людски права Европского парламенту. 

На конференциї, отримана и схадзка Югаса, Пастора и Винцеа, на хторей наглашене задовольство пре одволанє и успишни початок дводньовей конференциї и виражене очекованє же вона принєше значни резултати у поглядзе унапредзеня сотруднїцтва, черанки добрих праксох и дефинованя препорученьох за конкретни мири. Вони визначели значносц улоги меншинских заєднїцох як важного ресурса у вибудови моцнєйших економских вязох. 

През два днї конференциї учашнїки цо су представнїки националних меншинох и цалей Европи, буду бешедовац о Войводини як моделу културней автономиї, о меншинох и прейґгранїчним сотруднїцтву и економскей значносци того сотруднїцтва, як и о улоги националних меншинох у процесу приступаня ґу Европскей униї.