Бачка Тополя, 28. септембер – Предсидатель Скупштини АП Войводини Балинт Югас присуствовал нєшка на шветочносци у Бачкей Тополї, зоз хтору започата «Сезона култури Мадярскей у Сербиї и Сербиї у Мадярскей 2025/26».
Тота подїя, пошвецена дзецинским и младежским фолклорним ансамблом, оркестром, солистом и майстром народних ремеслох, отримана у орґанизациї Мадярского националного совиту и означує увод до «Сезони култури Мадярскей у Сербиї и Сербиї у Мадярскей 2025/26», хтора у наступних мешацох повяже числених уметнїкох, институциї и публику двох жемох.
«Попри моцних политичних, економских и привредних вязох, «Сезона култури Мадярскей у Сербиї и Сербиї у Мадярскей 2025/26» представя єдинствену нагоду за збогацованє наших одношеньох прейґ култури. Нєшка зме шведкове же Сербия и Мадярска маю найлєпши одношеня у своєй новшей историї, хтори засновани на щирим партнерстве и взаємним почитованю. Праве култура тот фундамент хтори преглїбює розуменє, будує мости и дава тирвацу моц нашому сотруднїцтву», визначел Югас. 
Початком тижня у Сент Андреї министрове култури Сербиї и Мадярскей, Никола Селакович и др Балаж Ганко, урядово наявели тоту єдинствену манифестацию, визначуюци же вона перши раз систематично представи културне нашлїдство и сучасну творчосц обидвох жемох – у Сербиї у другей половки 2025. року, а у Мадярскей од фебруара 2026. року.
На шветочносци у Бачкей Тополї присутних привитали министер култури и иновацийох Мадярскей др Балаж Ганко и народни посланїк др Балинт Пастор, а на нєй були присутни и числени представителє културних институцийох и дружтвох.