Сента/Нови Сад, 9. октобер – Предсидатель Скупштини АП Войводини Балинт Югас бул нєшка у Сенти на Сайму образованя «Шули-Експо», хтори традицийно каждого року орґанизує Национални совит мадярскей националней меншини.
Тота саямска манифестация наменєна школяром осмей класи основних школох дзе ше наставу трима на мадярским язику, алє и їх родичом и представнїком образовних институцийох, а надовязує ше на познати «Еду-Експо» хтори отримани дзень скорей зоз фокусом на представянє штреднїх школох и школярских домох.
Привитуюци присутних, предсидатель Скупштини АП Войводини Балинт Югас здогаднул и на значносц образованя на мацеринским язику як и важносц иснованя широкого спектру можлївосцох по питаню дальшого професионалного унапрямованя дзецох.
«Образованє фундамент каждого дружтва и ключне предусловиє за власни розвой каждого поєдинца. Насампредз важне же би млади мали можлївосц учиц и напредовац на своїм мацеринским язику, цо доприноши лєпшому розуменю наставного плана, алє и очуваню язика, култури и идентитету заєднїци ґу хторей припадаю. Таки подїї, як цо то Саям образованя Шули-Експо, даваю драгоцину нагоду школяром упознац ше зоз можлївосцами хтори им ше понука, алє и принєсц одлуки хтори формую їх будучносц», поручел предсидатель Югас.
Вон поволал школярох же би були любопитлїви у виглєдованю своїх талантох, родичох же би их потримали у виборох цо их инспирую, а просвитних роботнїкох же би и на далєй зоз пошвеценосцу преношели знанє и пестовали любов ґу ученю.
«Лєм зоз заєднїцким закладаньом можеме створиц дружтво дзе образованє будзе найвреднєйши капитал будуцих ґенерацийох», гварел Югас.
На сайму участвовали вецей як 1200 школярох и наставнїкох, як и 24 викладаче, а найвекше число ґимназиї и фахово штреднї школи у хторих ше наставу трима на мадярским язику. На сайму були и покраїнски секретар за образованє, предписаня, управу и национални меншини – национални заєднїци Роберт Отот, предсидатель Националного совиту мадярскей националней меншини Арпад Фремонд, предсидателька Општини Сента Гайналка Бурань и числени гражданє.