Брисел/Нови Сад, 13. октобер – Предсидатель Скупштини АП Войводини Балинт Югас пребувал нєшка у роботней нащиви Европскому парламенту, а у фокусу були предприступни фонди и можлївосци финансованя розвойних проєктох у Войводини.
Под час нащиви, у рамикох Европского тижня реґиону и городох, хтори нєшка шветочно отворени, Югас присуствовал на преподаваню о финансийних инструментох Европскей униї, з окремним огляднуцом на ИПА фонд – ключни механїзем потримовки Сербиї у процесу европских интеґрацийох.
«Европски тидзень реґионох и городох єдна з найзначнєйших подїйох пошвецених когезийней политики, под час хторого ше реґиї, городи и приношителє одлукох вєдно занїмаю зоз заєднїцкима виволанями. Мото «Вєдно формуйме будучносц» визначує значносц сотруднїцтва у креированю будучносци Европи», визначел Югас.
Вон наглашел же АП Войводина ма значни розвойни потенциял, окреме у польопривреди, ИТ секторе и иновацийох и же
през предприступни фонди ЕУ мож обезпечиц моцну потримовку за реализацию тих потенциялох.
Предсидатель Югас додал же процес приступаня Сербиї ґу Европскей униї треба же би бул провадзени зоз справедлївшим и уровноваженшим приступом, хтори адекватно препозна потерашнї резултати и намаганя. Як визначел, полноправне членство у ЕУ муши остац реална и витворлїва перспектива за Сербию, заснована на принципох сотруднїцтва, довирия и фер одношеньох.
У Бриселу Югас бешедовал и з посланїцу Европского парламенту Анамарию Вичек, хторей подзековал на дошлїдней потримовки европским интеґрацийом Сербиї, як и на тим же, як посланїца зоз Сербиї, одвичательно заступа интереси и Сербиї и Мадярскей у рамикох свойого парламентарного дїлованя.