Брисел/Нови Сад, 14. октобер – Предсидатель Скупштини АП Войводини Балинт Югас нащивел нєшка Реґионалне представнїцтво АП Войводини у Бриселу и участвовал на панел дискусиї под назву «Укладанє до будучносци»: Мудра, желєна и отримуюца урбана трансформация», хтора отримана у Мисиї Републики Сербиї при Европскей униї, у рамикох манифестациї Европски тидзень реґийох и городох.
Бешедуюци учашнїком, предсидатель Югас представел АП Войводину як реґион хтори успишно повязує традицию и иновациї, визначуюци єй розвойни потенцияли.
«Войводина историйно позната як житнїца Сербиї и реґион рижнородних културох. Наша богата польопривредна традиция остава фундамент економиї, алє нам ше у остатнєй децениї поспишело трансформовац до динамичного реґиону дзе ше
традиция природно преплєта зоз сучаснима иновациями», гварел Югас и насампредз визначел значносц ИТ сектору и сотруднїцтво зоз академскима институциями.
«Єден зоз ключних порушовачох розвою Войводини и швидки розвой ИТ сектору, хтори ше опера на моцне сотруднїцтво зоз Универзитетом у Новим Садзе. Таке злучованє знаня, иновацийох и поднїмательства оможлївело наставанє динамичней технолоґийней заєднїци хтора порушує мудру и отримуюцу трансформацию цалого реґиону», визначел Югас.
Панел дискусию орґанизовало Реґионалне представнїцтво АП Войводини у Бриселу, у сотруднїцтве зоз партнерскима институциями: представнїцтвами републики 
Сербскей, Восточней Македониї и Тракиї, Каналских островох зоз Велькей Британиї и Реґионалну розвойну аґенцию городу Букурешт.
Сход позберал амбасадорох и посланїкох Европского парламенту, представнїкох реґионалних и локалних власцох и експертох зоз обласци урбаного розвою и климатскей политики, хтори розпатрали модели укладаня до мудрих, желєних и витримуюцих городох.
У мено орґанизаторох присутних привитал Никола Вучуревич, шеф Реґионалного представнїцтва АП Войводини у Бриселу, як и амбасадор Републики Сербиї у Белґиї Александар Тасич.