Нови Сад/Бачинци/Мартонош, 21. октобер – Министер польопривреди, лєсарства и водопривреди др Драґан Ґламочич, предсидатель Скупштини АП Войводини Балинт Югас и народни посланїк др Балинт Пастор нєшка нащивели компаниї «Superior Foods» у Бачинцох и «Telek Paprika» у Мартоношу, дзе зоз руководительством тих подприємствох бешедовали о дальшим унапредзеню польопривредней продукциї и поживовей индустриї у Войводини.
Под час нащиви компаниї «Superior Foods» у Бачинцох, святочно отворена нова часц погону за преробок курчецини, до хторого инвестицийна ґрупа Hodler Asset Management зоз Мадярскей уложела седем милиони еври. З тоту инвестицию продукция модернизована, а капацитети фабрики преширени. Слово о другей найвекшей клальнї курчатох у Сербиї хтора прейґ найвекших тарґовецких ланцох у держави ма значну учасц у подмирйованю зоз швижу и преробену курчецину.
Министер польопривреди, лєсарства и водопривреди др Драґан Ґламочич наглашел же слово о значней мадярскей инвестициї хтора зоз помоцу програми за обезпечованє роботи Влади Републики Сербиї интеґровала важни ланєц хтори ма вецей як 50 кооперантох зоз цалей жеми.
Народни посланїк и лидер войводянск их Мадярох др Балинт Пастор визначел же пошвидко у тей фабрики будзе робиц вецей як 300 занятих и же барз значне же мадярски инвестициї преширени и на локални самоуправи у хторих нє жию представителє тей заєднїци, цо потвердзує моцне стратеґийне партнерство двох жемох.
У предлуженю програми, у Мартоношу нащивели компанию «Telek Paprika» и обишли продукцийни погони.
«Польопривреда фундамент розвою Войводини и сектор у хторим твориме нову вредносц, роботни места и сиґурносц за наших продуковательох. Дзекуюци моцному приятельству и партнерству Мадярскей и Сербиї направени амбиєнт у хторим ше успишно реализую програми Фондациї Просперитати, алє и директни мадярски инвестициї, нє лєм у Войводини, алє и у цалей Сербиї», гварел предсидатель Югас и наведол же праве компания «Telek Paprika» єдна спомедзи найуспишнєйших реґионалних продуковательох сушеней желєняви, паприґи и присмачкох, хтори дзекуюци квалитету вивожи вецей як проценти продукциї. Югас наглашел же у компанийох зоз Бачинцох и Мартоношу робя вецей як 500 роботнїки и же праве тоти компаниї жридло еґзистенциї за велї фамелиї у Войводини.
Нащиви реализовани же би унапредзели сотруднїцтво державох, покраїни и привреди, зоз наглашку на нови инвестицийни укладня, отверанє нових роботних местох и моцнєнє конкурентносци поживовей индустриї. Як визначене, Министерство польопривреди и АП Войводини предлужи потримовац проєкти и инвеститорох хтори доприноша отримуюцому розвою и розвою польопривреди.
Попри делеґациї Министерства и представительох компанийох, тоти компаниї обишли и державни секретар Атила Югас, як и заменїк покраїнского секретара за польопривреду, водопривреду и лєсарство Золтан Тот.