Суботица/Нови Сад, 2. новембер – Предсидатель Скупштини АП Войводини Балинт Югас присуствовал нєшка, на Сентянским теметове у Суботици, на традицийней комеморациї и екуменскей литурґиї хтори отримани на чесц нєвино страданим жертвом з 1944. и 1945. року.
На мемориялним комплексу Сентянского теметову, предсидатель Югас положел венєц на памятнїк «Птица зламаних кридлох», хтори направени на чесц вецей як тисяч нєвиним жертвом воєней репресиї.
Позберани дали почесц шицким жертвом и виражели сочувствиє їх потомком и фамелийом, наглашуюци значенє здогадованя, почитованя и помиреня.
Комеморацию и литурґию при памятнїку «Птица зламаних кридлох» ше отримує од 1990. року и вони представяю традицийне место зиходзеня представительох числених институцийох и орґанизацийох.
У мено Покраїнскей влади, венєц положел подпредсидатель Томислав Жиґманов. 
Венци положели и потомки жертвох, представителє Скупштини Городу Суботици, Кабинету городоначалнїка Суботици, Сивернобачкого управного округу, Конзулату Републики Мадярскей, як и представителє Националних совитох мадярскей, горватскей и бунєвацкей националней меншини, Нємецкого народного союзу, Єврейскей општини Суботица и политичних партийох.