Суботица/Нови Сад, 5. новембер – Предсидатель Скупштини АП Войводини Балинт Югас бул нєшка у Суботици на отвераню конференциї о проєкту SharingValues, хтори ше реализує у рамикох Interreg–IPA Програми прейґгранїчного сотруднїцтва Сербия – Мадярска.
Проєкт SharingValues ма циль очувац и туристично вредновац културне нашлїдство городох Суботици и Кишкунгалашу, як и розвой отримуюцих културно-туристичних драгох хтори допринєшу моцнєню вязох и заєднїцкей промоциї локалних вредносцох зоз обидвох бокох гранїци.
Предсидатель Югас визначел же тот проєкт приклад кельо прейґгранїчне сотруднїцтво важне за очуванє културного и архитектонского нашлїдства и моцнєнє приятельства двох жемох.
«Очуванє културного и архитектонского нашлїдства єдно зоз найважнєйших задаткох каждей заєднїци хтора жада зачувац свой идентитет и тото нашлїдство пренєсц будуцим ґенерацийом. Проєкти як цо SharingValues указую кельо програми прейґгранїчного сотруднїцтва медзи Сербию и Мадярску драгоцини и нє лєм же оможлївюю обнову и защиту наших памятнїкох култури, алє змоцнюю и приятельство и довириє», визначел Югас.
Вон наглашел же реконструкция Городскей хижи у Суботици, єдней з найкрасших символох того городу и цалей Войводини, найлєпши приклад як, зоз потримовку Европскей униї и заєднїцку роботу, мож ришовац важни питаня и чувац вредносци цо нас злучую.
«То драга хтору маме предлужиц – сотруднїцтво, взаємне порозуменє и очуванє того цо нас твори як окремних», поручел Югас.
На конференциї присутним бешедовали народни посланїк др Балинт Пастор, предсидатель Скупштини городу Суботици Даниєл Дїванович, заменїк городоначалнїка Суботици и менаджер проєкту SharingValues Чила Ґоли, як и Роберт Филеп, городоначалнїк Кишкунгаласу.
Проєкт SharingValues, хтори облапя и реконструкцию закрица Городскей хижи, ше реализує през сотруднїцтво Городу Суботици и їх институцийох зоз партнерами зоз Мадярскей, з потримовку Европскей униї. Тророчни проєкт будзе тирвац по 15. април 2028. року, а роботи на закрицу Городскей хижи почню у першей половки 2026. року и облапя подполну рестаурацию, конзервацию и адаптацию конструкциї закрица и очуванє автентичного випатрунку обєкту.
Реконструкцию ше окончи под фаховим надпатрунком Заводу за защиту памятнїкох култури и у складзе зоз строгима конзерваторскима предписанями. Окремну увагу ше пошвеци очуваню ориґиналних материялох и декоративних елементох, а добре зачувани ориґинални «Žolnai» черепи ше очисци, защици и враци на свойо место.