Нови Сад, 19. новембер – Предсидатель Скупштини АП Войводини Балинт Югас наютре будзе участвовац на Осмим реґионалним дїловним форуму, хтори ше 20. и 21. новембра отрима у Новим Садзе у орґанизациї Автономней покраїни Войводини и Скупштини европских реґионох (АЕР), у сотруднїцтве зоз Привредну комору Войводини (ПКВ).
За осем роки иснованя, Реґионални дїловни форум вироснул до доминантней дїловней платформи хтора кажди рок повязує привреднїкох, институциї и орґанизациї з реґиону и Европи, а того року ше очекує значну учасц компанийох и делеґацийох з Турскей, Французкей, Мадярскей и других европских жемох. Участвовац буду и еминентни компаниї з реґиону, реґионални привредни комори, розвойни аґенциї и институциї хтори потримую розвой малих и штреднїх подприємствох и унапредзенє инвестицийней клими.
Предсидатель Югас визначел же за Скупштину АП Войводини од велькей значносци тото же тот форум орґанизує уж осми раз, як и тото же ше го реализує у партнерстве зоз Скупштину европских реґийох (АЕР), чий Войводина активни и продуктивни член.
„Форум настал як инициятива Скупштини АП Войводини и АЕР-а, а дзекуюци моцней потримовки и орґанизацийней енерґиї Привредней комори Войводини прероснул до єдней найзначнєйшей дїловей подїї у реґиону. ПКВ дала моторну моц хтора тот форум претворела до места дзе ше заключує конкретни дїловни догварки, снує партнерства и дзе нашо привредни потенцияли приходза до вираженя“, наглашел Югас.
Перши дзень учашнїкох очекує панел дискусийох о ключних секторох, од Дунаю як туристичного бренду, прейґ интелиґентней мобилносци и автомобилскей индустриї, по аґрарно-поживови ланц, як и орґанизовани Б2Б стретнуца хтори уж традиционално резултую з новима дїловнима аранжманами.
Други дзень локални самоуправи з Войводини представя свойо проєкти и инвестицийни потенцияли, уключуюци и менєй розвити општини, цо важне за ровномирни реґионални розвой.
„Форум повязує людзох, идеї и можлївосци. Други дзень свойо потенцияли представя општини Бачка Тополя, Ириґ и Зренянин, а представи ше и општина Дрвар. Наш циль то стабилни и ровномирно розвити реґион. Прето од винїмковей значносци же праве на тим форуме представяме рижни локални штредки, а нє лєм вельки центри. Кед у истей сали бешедую републични и покраїнски институциї, медзинародни делеґациї и локални самоуправи, то найлєпша драга по конкретни проєкти и нови инвестициї“, поручел Югас.