Суботица/Нови Сад, 27. новембер – Предсидательови Републики Сербиї Александрови Вучичови и предсидательови Влади Мадярскей Викторови Орбанови нєшка у Суботици додзелєни припознаня хтори ноша мено покойного предсидателя Скупштини АП Войводини и Союзу войводянских Мадярох Иштвана Пастора, а хтори додзелює Фондация «Иштван Пастор».
На шветочносци у Городскей хижи у Суботици, на хторей присуствовали и предсидатель Скупштини АП Войводини Балинт Югас и предсидателька Покраїнскей влади Мая Ґойкович, наглашене же тогорочни припознаня представяю вираз почитованя ґу историйно значней заєднїцкей роботи яку Вучич и Орбан почали зоз Иштваном Пастором, и дзекуюци єй сербско – мадярски одношеня преросли до моцного стратеґийного партнерства и як приклад су яки заслужує же би ше шлїдзел у цалей Европи.
Фондация «Иштван Пастор» у обгрунтованю наведла же предсидатель Вучич достава награду за ключну улогу у вибудови довирия, сотруднїцтва и стратеґийного партнерства медзи двома народами, и же ше його мено вяже и за историйну одлуку, хтора принєшена у його мандату предсидателя Влади 30. октобра 2014. року, з яку зоз правней системи утаргнути принцип колективней вини мадярского народу.
Наведзене и же Виктор Орбан достава припознанє за тирваци и пресудни заслуги у историйним помиреню медзи мадярским и сербским народом, за преглїбйованє добресушедских одношеньох, як и за вибудов и моцнєнє стратеґиного партнерства.
Фондация «Иштван Пастор» основана 12. юния 2024. року зоз цильом достоїнствено очувац духовне и политичне нашлїдство Иштвана Пастора, чувац памятку на ньго и преношиц його приклад будуцим ґенерацийом. Мисия Фондациї же би дала потримовку хорим дзецом, талантованей младежи, загроженим або особом цо ше нашли у стану висшей сили, а хтори нє облапени з иснуюцу систему помоци. Єден зоз важних цильох Фондациї то и рочне додзельованє Награди «Иштван Пастор», зоз хтору Управни одбор Фондациї оддава припознанє тим цо здобули тирваци заслуги у розвою сербско-мадярских одношеньох, у преглїбйованю приятельства, довирия и сотруднїцтва двох народох, як и у очуваню и пестованю политичного и явного нашлїдства Иштвана Пастора.