Нови Сад, 12. децембер – Предсидатель Скупштини АП Войводини Балин Югас нєшка бул присутни на закончуюцей шветочносци и додзельованю рочних наградох Видавательного союзу Форум, установи хтора уж седем децениї представя єден зоз найважнєйших слупох мадярскей култури у Сербиї.
Бешедуюци о значносци тей институциї, Югас визначел же Форум през децениї вибудовал окремне место у културним простору як установа хтора нє видава лєм кнїжки, алє и обєдинює знанє, творчосц и уметнїцку енерґию цалей мадярскей заєднїци.
«Форум остал як єдна зоз найсиґурнєйших потримовкох мадярскей култури у Сербиї, бо витирвало чува континуитет, алє ше и присподобює сучасним цеком и потребом читательох», визначел Югас, додаваюци же тота шветочносц нє представя лєм конєц рока, алє и потвердзенє витирвалосци и моци нового початку.
Вон здогаднул же Форум од 1957. року пошвецено пестує културне нашлїдство хторе уж ґенерацийом духовни дом и наглашел же тогорочни видавательни резултати, 21 нова публикация и числени литературни и уметнїцки виданя, шведоча о очуваню традициї и стаємней обнови, зоз окремним акцентом на предлужованє обнови шедзиска през розписани тендер за Art cafe.
Винчуюци тогорочним лауреатом, Югас наглашел же їх творчосц зоз свою квалитету и автентичним висловом доприноши и заєднїци и вкупней културней сцени у Сербиї.
Литературна награда «Híd» додзелєна Еви Толди, Форумова подобова награда припадла Балажови Шарканьови, а Войводянска мадярска уметнїцка награда Золтанови Шифлишови.