Нови Сад/Канїжа, 12. децембер – Предсидатель Скупштини АП Войводини Балинт Югас нащивел нєшка у Канїжи Войводянску пасовацку академию, дзе бул присутни на церемониї «Пасовацки Крачун», з нагоди успишного законченя 2025. року.
Предсидатель Югас визначел же Войводина ма богату и препознатлїву традицию пасовацкого спорту, бо праве тот простор децениями правел шампионох хтори на европских и шветових першенствох, па и на олимпийских бавискох, представяли нашу жем на найвисшим уровню.
«Така традиция представя и обовязку же бизме укладали до младих спортистох. Войводянска пасовацка академия твори условия у яких дзеци рошню, напредую и и маю довириє до своїх потенциялох. Нєшка зме видзели кельо су талантовани и мотивовани, и прешвечени зме же медзи нїма рошню нови мена хтори буду славиц тот спорт и тот простор», гварел Югас.
Войводянска пасовацка академия основана 2019. року зоз помоцу Влади Мадярскей, а у сотруднїцтве зоз Општину Канїжа, Мадярским националним совитом и Мадярску пасовацку академию «Козма Иштван», зоз потримовку Пасовацкого союзу Сербиї, Олимпийского комитету Сербиї и Спортского союзу Сербиї.
«Пред пейцома роками лєм малочислени верели же ше у Канїжи розвиє таки моцни центер хтори позбера и вибудує млади таланти. Нєшка Академия нє лєм спортска институция, алє и реґионална моц хтора потвердзує же можлїве плановац будучносц, напредовац и зазначовац успихи – ту, у власним обисцу», гварел Югас и наглашел же у 2025. року до Академиї ходзели 21 хлапец и 10 дзивчата зоз вецей як 15 местох у Войводини.
«Зоз интернатом, поряднима тренинґами и провадзеньом школского успиху, тот центер понука младим будучносц и можлївосци у родзеним краю», наглашел Югас и додал же успихи зоз 2025, року бешедую сами за себе: стрибло на Балканским першенству, медалї на Европским першенству, пласмани блїзко финалу на Шветовим першенству до 20 рокох, як и вецей титули за перше место у Сербиї и Мадярскей.