Сента/Нови Сад, 16. децембер – Предсидатель Скупштини АП Войводини Балинт Югас бул нєшка на шветочней програми з нагоди означованя 20. рочнїци иснованя Заводу за културу войводянских Мадярох, хтора отримана у Дому култури у Сенти.
Бешедуюци присутним, предсидатель Югас визначел же два децениї роботи тей установи представя вельо вецей як часова дистанца бо бешедує о слики яку єдна заєднїца вибудовала о себе, своїм идентитету и вредносцох.
«Наша култура нє предмет до орману, алє заєднїцке диханє. Завод за културу войводянских Мадярох уж двацец роки чува, збогацує и преноши тото диханє, повязуюци установи и творительох Карпатского реґиону и будуюци простор у хторим ше прешлосц нє лєм призначує, алє ше твори будучносц», гварел Югас.
Здогаднул же Завод основал, 2005. року, Мадярски национални совит, же од 2008. року ма статус державней институциї, а же АП Войводина єй соснователь, и наглашел же праве континуитет и заєднїцка одвичательносц оможлївели же би ше Завод розвил до єдней зоз ключних културних институцийох войводянских Мадярох.
Предсидатель Югас подзековал занятим, виглєдовачом, уметнїком и сотруднїком Заводу, визначуюци же їх часто нєобачуюца, алє пошвецена робота оможлївює же би ше войводянска мадярска култура нє лєм отримала, алє и розвивала през публикациї, виглєдованя, манифестациї, роботу зоз младима талантами и диґитализацию културного нашлїдства.
У рамикох шветочней програми, пригодни бешеди отримали и народни посланїк и лидер войводянских Мадярох др Балинт Пастор, директорка Заводу Дєндї Корманьош, снователь Заводу мр Єне Гайнал, предсидатель Мадярского националного совиту Арпад Фремонд, державни секретар задлужени за националну политику Мадярскей Леринц Нача, а на шветочносци була и заменїца державного секретара за културу Мадярскей Ирен Новак.