Нови Сад, 23. януар – Предсидатель Скупштини АП Войводини Балинт Югас, вєдно з подпредсидателями Миланом Суботином и Борисом Новаковичом, присуствовал нєшка на означованю 84. рочнїци Новосадскей рациї.
На здогадованє на вецей як штири тисячи страданих людзох, найвецей Сербох, Єврейох и Ромох, под час дньох у януару 1942. року, делеґация Скупштини АП Войводини положела венєц на памятнїк «Фамелия», на Кею жертвох рациї у Новим Садзе.
На комеморативним сходзе присутних привитал городоначалнїк Нового Саду Жарко Мичин, спомин Сербскей православней церкви служел Його Святосц Патриярх сербски Порфириє, а сослужовали Митрополит бачки Ириней, док спомин Єврейскей заєднїци отримал верховни Рабин Сербиї Исак Асиел.
На здогадованє на нєвино страданих венци положели и предсидателька Покраїнскей влади Мая Ґойкович, представителє амбасадох Израїла и Мадярскей, предтавителє Беоґраду, Нишу, Краґуєвцу и других городох у Сербиї, єврейских и ромских заєднїцох, потомки жертвох и други, а по тим, з ладї Ричней флотили Войска Сербиї спущени венєц до Дунаю.