Сента, 23. януар – Предсидатель Скупштини АП Войводини Балинт Югас присуствовал нєшка у Сенти на централней шветочносци означованя Дня мадярскей култури у Войводини, хтора привитала числених представнїкох културного, явного и политичного животу.
Предсидатель Югас визначел же за мадярску заєднїцу у Войводини култура представя фундамент очуваня идентитету, язика и традициї, алє и важни мост сотруднїцтва и розуменя медзи народами хтори жию на тих просторох.
«Мадярска култура у Войводини нє лєм часц културного нашлїдства єдней заєднїци, алє є и драгоцина часц вкупней културней рижнородносци нашей покраїни и Републики Сербиї. Покраїнска администрация остава пошвецена потримовки институцийом, творительом и проєктом хтори доприноша очуваню идентитету и моцнєню медзисобного почитованя и сотруднїцтва», наглашел Югас.
Вон оценєл же Дзень мадярскей култури у Войводини представя єден зоз найзначнєйших датумох за мадярску заєднїцу, бо иницирує зазберованє коло заєднїцкого цилю – очуваню културного нашлїдства и моцнєню обачлївосци мадярскей култури у явним животу.
Шветочносц традиционално орґанизую Културни союз войводянских Мадярох и Завод за културу войводянских Мадярох, под покровительством Националного совиту мадярскей националней заєднїци, а того року є отримана у рамикох програми «Сезона култури Мадярскей у Сербиї и Сербиї у Мадярскей 2025/26».
У рамикох шветочносци придати награди и плакети поєдинцом и институцийом хтори зоз свою роботу охабели значни шлїд у очуваню култури, язика и идентитету мадярскей заєднїци у Войводини.
Присутним ше зоз шветочнима бешедами представели посланїк др Балинт Пастор, предсидатель Националного совиту мадярскей националней заєднїци Арпад Фремонд, як и державна секретарка у Министерству култури и иновацийох Мадярскей Анита Киш-Гедї.