Нови Сад/Ґунарош – Предсидатель Скупштини АП Войводини Балинт Югас присуствовал нєшка у Ґунарошу на шветочносци з нагоди примопридаваня огньогасней превозки Добродзечному огньогасному дружтву Ґунарош. За превозку, вкупней вредносци 26.500,00 еври, средства вєдно обезпечели Општина Бачка Тополя, Месна заєднїца Ґунарош и Компания «Перутнина Птуй» хтора ма продукцийни погон у Бачкей Тополї.
Визначуюци же тота инвестиция представя моцнєнє єдней заєднїци, предсидатель Югас наглашел же у Ґунарошу и околїску улога добродзечних огньогасцох ма ключне значенє, з оглядом на тото же найблїзша огньогасна єдинка оддалєна вецей як 25 километери, а рочнє просеково у тим месце єст коло 15 интервенциї.
«Добродзечне огньогасне дружтво у Ґунарошу приклад моци и пошвеценосци бо ма коло сто члени, вецей як двацец оперативних, оспособених огньогасцох. Окреме драгоцина їх робота з дзецми и младима, бо ше на таки способ систематично твори нови ґенерациї одвичательних и оспособених людзох. Прето нєшка щиро дзекуєм шицким добровольцом на оддвоєним часу од фамелиї, на шмелосци и пожертвованосци. Жичим им же би мали цо менєй узбуни, алє и же би им кажда интервенция була успишна и безпечна, а нова превозка хтору нєшка придаваме най будзе нє лєм средство защити, алє и символ заєднїцтва хторе нас повязує», поручел Югас.
Як наведол, покраїнска администрация континуовано потримує добродзечни огньогасни дружтва прето же су значни слуп локалних заєднїцох. Так у тим року обезпечена потримовка за 36 дружтва у вкупней суми 30 милиони динари, док у предходних шейсцох рокох за обновйованє їх опреми и рядову роботу видвоєни 140 милиони динари.
На шветочносци присуствовали предсидатель Општини Бачка Тополя Адриян Сатмари, предсидателька Добродзечного огньогасного дружтва Дора Шинкович, представителє Компаниї «Перутнина Птуй» и Месней заєднїци Ґунарош.