Нови Сад, 12. фебруарa – Предсидатель Скупштини АП Войводини Балинт Югас и ґенерални директор Новосадского сайму Слободан Цветкович бешедовали нєшка о значносци потримовки локалним продуковательом и манифестациї «Войводянска берза смакох», хтора убудуце постанє порядна провадзаца програма шицких значних саямских подїйох.
Берза смакох, хтору ше отримує у Аули Новосадского сайму, ма за циль промоцию и унапредзованє дїлованя малих продуковательох зоз териториї АП Войводини.
Манифестация обдумана як платформа за представянє малих и штреднїх подриємствох, зоз фокусом на звекшанє їх обачлївосци на тарґовищу, запровадзованє директного контакту зоз трошителями и моцнєнє капацитетох за предаванє.
Предсидатель Югас и директор Цветкович бешедовали о дальшим розвою манифестациї, як и о можлївосцох за активнєйше уключованє припаднїкох меншинских националних заєднїцох хтори жию и робя на териториї Войводини.
Собешеднїки визначели важносц ровноправней учасци шицких заєднїцох у привредних и промотивних подїйох, наглашуюци же Берза смаку може представяц значну нагоду за додатну афирмацию продуковательох зоз шора националних заєднїцох, як и за представянє богатства мултикултуралносци и традиционалних продуктох характеристичних за Войводину.
Берза смакох ше так позиционує нє лєм як привредна манифестация, алє и як простор за повязованє, сотруднїцтво и промоцию рижнородносци хтора представя єдно зоз ключних характеристикох АП Войводини.