Сента, 25. марец – Предсидатель Скупштини АП Войводини Балинт Югас присуствовал нєшка на конференциї и округлим столу „Явни збирки у витворйованю култури – улога и спокуси установох хтори окончую дїялносц явних збиркох у онлайн (диґиталним) просторе у 21. вику“, хтора отримана у шветочней сали Городскей хижи у Сенти.
На сходзе присуствовали представителє релевантних културних институцийох, фаховци з обласци диґитализациї и очуваня културного нашлїдства зоз Сербиї, Мадярскей и Румуниї, з цильом черанки искуствох и унапредзеня сотруднїцтва у обласци явних збиркох и диґиталного културного простору.
У своєй бешеди присутним Югас визначел же диґитализация нєшка превозиходзи технїчни рамик и постава ключне културне питанє.
„Диґитализация нєшка вецей нє лєм средство, алє способ роздумованя. Вона оможлївює же би културне нашлїдство постало доступне, розумлїве и живе“, наглашел Югас и указал на окремну значносц тей теми за Войводину як мултикултурного штредку.
„У просторе як цо то Войводина, дзе нашлїдство вецейязичне и вецейпасмове, диґитализация и питанє идентитету. Тото цо нє присутне у диґиталним просторе, вше менєй присутне и у колективней свидомосци“, визначел Югас и додал же сучасни технолоґиї отвераю нови можлївосци за очуванє и интерпретацию културного нашлїдства.
„Штучна интелиґенция вецей нє обецунка будучносци, алє реалносц хтора нам помага лєпше розумиц и представиц власне нашлїдство“, гварел предсидатель Скупштини АПВ и визначел важносц приблїжованя културного нашлїдства младим.
Конференцию орґанизовал Завод за културу войводянских Мадярох у сотруднїцтве зоз Националним совитом мадярскей националней заєднїци, з учасцу числених институцийох з реґиону и потримовку медзинародних проєктох хтори унапрямени на диґитализацию културного нашлїдства.