Нови Сад, 26. марца – Предсидатель Скупштини АП Войводини др Балинт Югас присуствовал нєшка на Рочней скупштини Дружтва лїкарох Войводини Сербского лїкарского дружтва хтору ше традицийно орґанизує у покраїнским парламенту.
Привитуюци присутних членох Дружтва лїкарох Войводини, предсидатель Югас визначел же медицина представя вельо вецей од професиї, наглашуюци же то поволанка хтора над’живює поєдинца и охабя тирваци шлїд у дружтве.
«Дружтво лїкарох Войводини нє лєм фахове здруженє. Воно слуп фахового авторитету, чувар етики лїкарскей поволанки и порушовач розвою медицинскей науки и пракси у нашей Покраїни. Зоз традицию длугшу вецей як єднен вик, тота институция потвердзує континуитет знаня, одвичательносци и пошвеценосци и дава стабилносц и перспективу здравственей системи Войводини», гварел предсидатель Югас.
Вон наглашел же здравство и у 2026. року медзи приоритетами покраїнского буджету, за цо опредзелєни вецей як три милиярди динари, од хторих 1,26 милиони на инфраструктурни проєкти, а два милиони за програми здравственей защити.
«Медзитим, важне повесц и же анї єдна инвестиция, анї єден будинок и анї єдна опрема нє можу заменїц тото цо найважнєйше, а то знанє, искуство и пошвеценосц лїкарох. Праве прето улога фаху нєзаменлїва. През континуовану едукацию, черанє знаньох и фахови сходи, ви нє унапредзуєце лєм медицину алє змоцнюєце и довириє гражданох до здравственей системи», поручел Югас.
На Рочней скупштини Дружтва лїкарох Войводини вибрани роботни цела, прилапени звити о роботи и план роботох за 2026. рок, а под час шветочней часци уручени и рочни награди того лїкарского дружтва.