Donna mama DonnaНови Сад, 9. април – Предсидатель Скупштини АП Войводини др Балинт Югас бешедовал нєшка зоз делеґацию Канцелариї за инклузию Ромох, хтору творели окончователь длужносци директора Желько Раду и покраїнска посланїца и член Националного совиту ромскей националней меншини Єлена Йованович.
Сход отримани з нагоди Шветового дня Ромох, хтори ше означує 8. априла, а бешедоване о унапредзованю положеня ромскей заєднїци, з окремним акцентом на значносц образованя, обезпечованя роботи и системскей потримовки инклузиї.
Предсидатель Югас визначел же Шветови дзень Ромох источашнє и здогаднїк, нє лєм за бешеду о унапредзованю положеня Ромох, алє и о зазначених резултатох хтори вишли зоз афирмацийних мирох институцийох, а найвецей их єст у образованю. 
«Образованє и институционална потримовка ключни предусловия за подполну дружтвену инклузию и ровноправносц и покраїнска администрация у тим змислу предлужи давац потримовку проєктом националних заєднїцох и националних совитох. Винїмково важне очувац национални идентитет и пестовац мацерински язик, алє тиж важне и здобуц образованє и схопносци яки потребни на тарґовищу роботи. Тото директно уплївує на злєпшанє еґзистенциялного питаня, алє и на саму инклузию», гварел предсидатель Югас.
Окончователь длужносци директора Канцелариї за инклузию Ромох Желько Раду визначел же ше тота национална заєднїца и на далєй зочує зоз численима спокусами, алє и же подзековни факт же каждого року рошнє число припаднїкох ромскей заєднїци 
хтори уписую и закончую штреднє и високе образованє.
Член Националного совиту ромскей националней заєднїци Єлена Йованович наглашела же у 15 валалох зоз дзешец општинох иницированє запровадзованє службеного хаснованя ромского язика, оценююци тото як историйни момент.
Делеґация придала предсидательови Югасови заставу ромскей националней заєднїци хтору ше визначи у Скупштини АП Войводини попри других заставох националних заєднїцох чийо ше национални совити находза у АП Войводини.