Нови Сад, 16. април – Предсидатель Скупштини АП Войводини др Балинт Югас и предсидателька Покраїнскей влади Мая Ґойкович отримали нєшка порядну схадзку на хторей бешедовали о предлужованю потримовки проєктом у городох и општинох ширцом Войводини.
Предсидатель Югас и предсидателька Ґойкович оценєли же инвестициї хтори ше реализує з потримовку Покраїни добре напредую, окреме визначуюци реконструкцию памятного-чопу на Паличу и обєкт Баґольвар, пулмолоґийне оддзелєнє Общого шпиталю у Сенти и Дом школярох Ґимназиї за талантованих школярох «Бољаи» у Сенти.
Виражуюци задовольство з нагоди нєдавного обиходзеня инфраструктурних проєктох у Суботици и Старей Моравици, предсидатель Югас визначел же початок роботох на обновйованю спомин-чопу на Паличу представя предлужованє континуованого реализованя значних инвестицийох, хтори ше часточнє або у подполносци финансує з покраїнского буджету.
Югас и Ґойкович ше зложели же укладаня до защити културного нашлїдства и розвою туризму медзи ключнима приоритетами, маюци у оглядзе винїмкови туристични потенциял Войводини, хтори з рока на рок зазначує вше векшу учасц у вкупних привредних активносцох.
Предсидателька Ґойкович визначела же ше Войводина у остатнїх даскельо рокох вше баржей позиционує на туристичней мапи Европи, цо директно доприноши розвою малих и штреднїх подприємствох, отвераню нових роботних местох и вкупному економскому напредованю туристичних дестинацийох и цалей Покраїни.
Под час схадзки бешедоване и о актуалних темох у роботи покраїнскей администрациї, предстояцей схадзки Скупштини АП Войводини, як и о орґанизованю заєднїцкей конференциї у сотруднїцтве з Народну скупштину Републики Сербиї.