Мартонош/Нови Сад, 21. април – Предсидатель Скупштини АП Войводини др Балинт Югас нащивел нєшка предшколску установу «Нашо бисери», дзецинску заградку «»Дуга» у Мартоношу, дзе нєдавно реализовани роботи на обновйованю обєкту зоз средствами зоз покраїнского буджету.
Вєдно зоз Югасом, дзецинску заградку обишли подпредсидатель Покраїнскей влади и покраїнски секретар за образованє, предписаня, управу и национални меншини – национални заєднїци Роберт Отот, членїца Општинскей ради задлужена за образованє Аґнеш Баґань и предсидатель Скупштини општини Канїжа Жомбор Уйвари, а домашнї нащиви була директорка установи Отилия Марта.
У дзецинскей заградки «Дуга» реализовани роботи у вредносци 4,4 милиони динари, хтори облапяли гидроизолацию фасади и повали, зоз чим значно унапредзени условия пребуваня дзецох и роботи занятих.
Бешедуюци медийом, Югас визначел же образованє єден зоз ключних приоритетох покраїнскей администрациї.
«Зоз нєшкайшим прикладом жадаме указац же нє бешедуєме лєм декларативно, алє робиме систематични и континуовано.
Окреме нам мило же ше тоту нащиву реализує на Шветови дзень дзецинских заградкох, бо зоз тим додатно указуєме на значносц укладаня до наймладших а то значи до будучносци», поручел Югас.
Вон наглашел же обовязка институцийох же би осиґурали безпечни и квалитетни условия за одрастанє.
«Таки проєкти директно уплївую на квалитет каждодньового живота дзецох, алє и занятих у установох. Окреме нам значне укладац до менших штредкох як цо то Мартонош, бо жадаме же би шицки дзеци мали єднаки условия, без огляду дзе жию», гварел Югас.
Бешедуюци о континуитету укладаня, вон здогаднул же ше у предходним периодзе значно инвестовало до предшколских установох у општини Канїжа, як и у цалей АП Войводини.
«Од 2021. року по нєшка, до обєктох предшколского образованя у тей општини уложени скоро 10 милиони динари, през числени проєкти реконструкциї, санациї и опреманя. Роботи реализовани у вецей населєних местох цо указує же водзиме рахунку о ровномирним розвою», наглашел Югас и додал же прешлого року до розвою образовних установох у Войводини уложени 500 милиони динари у вкупно 88 установох. У периодзе од 2016. до 2026. року, ширцом Войводини обновени коло 400 образовни установи, зоз укладанями у суми скоро 3 милиярди и 350 милиони динари.
Югас додал же нєшкайша нащива и приклад доброго сотруднїцтва шицких уровньох власци.
«Лєм зоз заєднїцку роботу покраїнских институцийох, локалней самоуправи и самих установох можеме посциговац таки резултати. Наш циль же би кажда предшколска и школска установа у Войводини були адекватно опремени и функционални», поручел Югас.
Предсидатель Скупштини АПВ заключел же покраїнска администрация предлужи зоз укладанями до образованя.