Нови Сад, 23. април – Предсидатель Скупштини АП Войводини др Балинт Югас приял нєшка делеґацию Ґимназиї зоз Бечею, хтору творели школяре и професоре, як и їх партнере зоз Шпаниї, Горватскей и Италиї, учашнїки медзинародней програми черанки «Ерасмус+».
Под час стретнуца, предсидатель Югас упознал госцох зоз историятом, роботу и компетенциями Скупштини АП Войводини, визначуюци значносц очуваня мултикултуралносци и медзинационалного складу як фундаменталних вредносцох покраїни.
«Вельке ми задовольство же зме угосцели младих людзох зоз розличних часцох Европи. Таки проєкти доприноша повязованю младих, черанки искуствох и лєпшому медзисобному розуменю», визначел Югас.
Вон наглашел же Скупштина нє лєм институция, алє и место дзе ше приноша одлуки од значносци за шицких гражданох, поручуюци же Войводина приклад штредку у хторим розличносци представяю богатство.
«Тото цо нєшка видзице ту доказ же людзе розличного походзеня, язику и култури можу вєдно бешедовац и приношиц одлуки у интересу шицких», додал предсидатель.
Учашнїки под час нащиви обишли скупштински будинок и упознали ше зоз способом функционованя институциї и процесом приношеня одлукох.
Ґимназия зоз Бечею вецей од децениї активно участвує у медзинародних проєктох, а нєшкайша нащива реализована зоз цильом же би ше партнером зоз иножемства представело дружтвено-политични рамик и мултиетнїчни характер АП Войводини.