Бачка Тополя, 15. май – Предсидатель Скупштини АП Войводини др Балинт Югас присуствовал нєшка у Бачкей Тополї на презентациї можлївосцох за дальше школованє и розвой кариєри хтору понука Министерство нукашнїх дїлох и полицийна професия, хтора орґанизована у сотруднїцтве Националного совиту мадярскей националней заєднїци и Орґанизациї за европску безпечносц и сотруднїцтво (ОЕБС), МУП – у Републики Сербиї и Центру за полицийну обуку.
Програма була наменєна младим, зоз цильом же би ше им приблїжело полицийну професию, як и же би ше упознали зоз можлївосцами дальшого школованя, фахового усовершованя и обезпечованя роботи у системи нукашнїх роботох.
Бешедуюци пред присутнима, предсидатель Югас визначел же полицийна професия представя вельо вецей од професиї, бо од нєй завиша сиґурносц, стабилносц и довириє до дружтва.
«Постоя професиї од хторих ше жиє, алє постоя и професиї од хторих завиши кельо єдно дружтво будзе сиґурне, стабилне и повязане. Полицийна професия праве єдна зоз нїх», поручел Югас.
Вон наглашел же у мултинационалним и штучним штредку, яки Войводина, окреме важне же би институциї були блїзки гражданом и же би розумели заєднїци хторим служа.
«Кед чловек може бешедовац зоз представительом институциї на своїм мацеринским язику, теда институция постава блїзша, чловечнєйша и моцнєйша. Прето важне же би медзи будуцима полицайцами, службенїками и лидерами институцийох були и млади зоз розличних националних заєднїцох, людзе хтори знаю свой штредок и жадаю ту будовац свою будучносц», визначел Югас.
Єдно зоз ключних порученьох подїї було значне присуство припаднїкох националних заєднїцох у институцийох, окреме кед слово о хаснованю мацеринского язику и моцнєню довирия медзи гражданами и институциями.
У програми участвовали представителє Министерства нукашнїх дїлох, Центру за основну полицийну обуку у Сримскей Каменїци, ОЕБС – у, националних совитох и образовних установох, як и млади заинтересовани за кариєру у обласци безпечносци и полицийней служби.
Окреме визначене же ше за програму приявели вкупно 30 млади, цо указує на вельке интересованє, алє и потребу же би ше младим представело животни и професионални драги хтори понукаю ясну перспективу, можлївосц фахового розвою и оставаня у своїм штредку.