Нови Сад, 15. май – Предсидатель Скупштини АП Войводини др Балинт Югас присуствовал нєшка на шветочним отвераню 93. Медзинародного сайма польопривреди у Новим Садзе, манифестациї хтора кажди рок традицийно призбера числених викладачох зоз обласци польопривреди и аґробизнису зоз цалого швета.
Тогорочни саям отворели министер польопривреди, лєсарства и водопривреди у Влади Републики Сербиї Драґан Ґламочич и министер польопривреди Ческей, жеми партнеру тогорочного сайму, Мартин Шебест’ян.
Република Ческа представи 12 компаниї хтори ше занїмаю зоз хованьом статку, преробком живинского меса, зоз продукцию статковей покарми, нашеньскей роби и алкоголним напойом. На їх штандох ше будзе понукац познате ческе пиво и специялитети домашнєй кухнї. У колективним наступу ше представя Италия, Шпания, Голандия, Република Сербска, Мадярска и Чарна Гора.
Госцом и учашнїком на сайму польопривреди бешеду отримала и предсидателька Покраїнскей влади Мая Ґойкович хтора поручела же нєт вельо манифестациї у нашим реґиону хтори маю угляд и значносц яку ма тот саям и наглашела же Покраїнска влада предлужи моцно потримовац розвой польопривреди у Войводини през конкретни мири и укладаня.
Дзекуюци викладачом и институцийом хтори потримали орґанизацию и отримованє тогорочного польопривредного сайму, ґенерални директор Новосадского сайму Слободан Цветкович гварел же тот саям уж 93. роки место за промоцию нових продуктох и науково-технолоґийних витвореньох и додал же саям доприноши интензивованю медзинародного сотруднїцтва и же того року у фокусу диґитализация, нови технолоґиї и желєни инициятиви. Присутним на шветочним отвераню бешеду отримал и городоначалнїк Нового Саду Жарко Мичин.
Медзинародни саям польопривреди у Новим Садзе будзе тирвац по 21. май, а того року присутни 1.200 викладаче зоз 40 деражвох на коло 50.000 квадратни метери отвореного и завартого простору.