Рабе/Нови Сад, 30. май – Предсидатель Скупштини АП Войводини др Балинт Югас присуствовал нєшка на традиционалней манифестациї отвераня гранїчних преходох Рабе, Киберхаза и Беба Веке на тромеджи Републики Сербиї, Мадярскей и Румуниї, у рамикох Реґионалного сотруднїцтва Дунай – Криш – Мориш – Тиса (ДКМТ).
Тота манифестация ше отримує каждого року, остатнього викенду мая, при каменю гранїчнїку «Triplex Confinium», хтори представя символ повязованя, сотруднїцта и историйних одношеньох трох державох.
Предсидатель Югас визначел же манифестация отверанє тромеджи на найлєпши способ указує тото цо людзе з тих крайох оддавно знаю, а то же зме вельо блїзши єдни другим як цо то гранїци на мапи указую. 
«Тото место то место стретнуца. Место на хторим обачлїве кельо сотруднїцтво може буц успишне кед постої медзисобне почитованє и добра намира. Ту дзе людзе жадаю лєгчейше преходиц гранїцу, же би вєдно розвивали свойо општини и городи, же би млади видзели перспективу у тим реґиону», поручел предсидатель Югас.
Вон додал и же винїмково важне же сотруднїцвто у рамикох ДКМТ, хторе збера вецей як пейц милиони людзох, тирва и после трицец рокох, бо воно нє представя лєм административни рамик, алє резултує з конкретнима проєктами як цо то розвой прейґгранїчней инфраструктури, модернизация гранїчних преходох, повязованє Суботици и Сеґедина и подобне.
«Войводина прето предлужи потримовац кажду инициятиву хтора повязує людзох и моцнї сотруднїцвто у реґиону. Бо нєшка ту нє лєм отвераме гранїцу на єден дзень. Ми потвердзуєме єдну важну идею, же будучносц того реґиону у повязованю, довирию и нормалних, добрих одношеньох медзи людзми. А то, у чаше у хторим жиєме, можебуц и найважнєйше», наглашел Югас.
На шветочносци бешедовали и подпредсидатель Скупштини жупаниї Бач-Кишкун др Марка Корнел, подпредсидатель Совиту жупаниї Тимиш Александру Адриан Йовеску и директор Директората за комуникациї, стратеґиї и явну управу Жупаниї Арад Адрей Андо, а символично отримане обегованє у хторим участвовали дзеци зоз Сербиї, Мадярскeй и Румуниї, после чого им уручени награди.