Нови Сад/Темишвар, 3 юний – Подпредсидатель Скупштини Александра Малетич вибрана нєшка на Ґенералним зашеданю Скупштини европских реґийох (АЕР) у Темишвару за подпредсидателя тей найвекшей и з моцним уплївом нєзависней мрежи европских реґийох.
Єдногласни вибор подпредсидателя Малетич представя потведзенє же реґиї призберани у рамикох АЕР препознали АП Войводину як сиґурного и кредибилного партнера, цо є порихтани активно доприношиц моцнєню медзиреґионалного сотруднїцтва. Тота функция додатно змоцнї позицию АП Войводини у АЕР и отвори нови можлївосци за черанку искуствох, запровадзованє партнерствох и уключованє до розвойних инициятивох и проєктох.
Под час ґенералного зашеданя АЕР у Темишвару отримани сходи Бироу и Форум реґиону, як и вецей тематски роботнї. Учашнїки прилапели и Темишварску декларацию о демократичней витримовносци, з яку потвердзена заєднїцка пошвеценосц моцнєню демократских институцийох, борби процив дезинформацийох и унапредзованю сотруднїцтва европских реґийох. 
Скупштина европских реґийох (АЕР), як найвекша нєзависна мрежа реґионалних власцох у Европи, призберує реґиї зоз цильом моцнєня медзиреґионалного сотруднїцтва, черанки знаня и унапредзованя европских реґионалних политикох. АП Войводина член АЕР од 2002. року, а тото штварти раз же представнїк Войводини окончує функцию подпредсидателя тей углядней орґанизациї.