Нови Сад, 4. юний – Предсидатель Скупштини АП Войводини др Балинт Югас и предсидателька Покраїнскей влади Мая Ґойкович отримали нєшка рядову мешачну роботну схадзку на хторей бешедовали о сотруднїцтве покраїнских институцийох и пририхтованьох за предстояцу схадку Скупштини АП Войводини.
У фокусу розговаркох були предлоги одлукох и других актох хтори ше концом мешаца найду на дньовим шоре схадки, а окремну повагу ше пошвеци темом з обласци образованя и школярского стандарду, як и активносцом у обласци медзиреґионалного и прейґгранїчного сотруднїцтва.
Предсидатель Югас информовал предсидательку Ґойкович о активносцох Скупштини АПВ у рамикох Скупштини европских реґийох (АЕР), визначуюци значносц вчерайшого вибору подпредсидательки Скупштини АПВ Александри Малетич за подпредсидательку тей уплївуюцей и велькей мрежи европских реґийох.Тиж, визначела и важносц факту же Войводина пошвидко превежнє предшедованє з Еврореґию Дунай–Криш–Мориш–Тиса (ДКМТ), цо представя додатне моцнєнє улоги у реґионалним сотруднїцтве и повязованю.
Собешеднїки бешедовали и о резултатох у обласци туризму у АП Войводини, визначуюци же рост числа туристичних приходох и ноцованьох у перших пейцох мешацох того року потвердзую значносц укладаня до туристичного понукнуца и инфраструктури, як и вельки потенциял дальшого розвою того привредного конару.