Нови Сад, 11. юний – Предсидатель Скупштини АП Войводини др Балинт Югас нащивел нєшка Матицу сербску, дзе зоз предсидательом Матици сербскей проф. др Драґаном Станичом и сотруднїками бешедовал о унапредзованю сербско-мадярских културних и наукових вязох, як и о резултатох проєктох хтори пошвецени пестованю одношеньох двох народох.
На схадзки були присутни и руководитель проєкту о сербско-мадярских културних вязох проф. др Корнелия Фараґо, як и члени проєктного тиму проф. др Ференц Немет и др Милена Кулич.
На стретнуцу представени резултати длугорочней роботи Матици сербскей на преучованю и пестованю сербско-мадярских културних, литературних и наукових одношеньох. Окремну увагу ше пошвецело науково-виглєдовацкому проєкту «Сербско-мадярски културни вязи», як и зборнїку роботох «Зоз историї сербско-мадярских културних вязох 3. – A szerb–magyar kulturális kapcsolatok történetéből 3.» хтори обявени у виданю Матици сербскей.
Предсидатель Югас визначел же ше сербско-мадярски одношеня нєшка находза на историйно найвисшим уровню и наглашел значносц културного и наукового сотруднїцтва як єдного зоз найтвардейших фундаментох того партнерства.
«Проєкт хтори реализує Матица сербска, як и обявени зборнїки, представяю тирваце доприношенє лєпшому медзисобному розуменю, преучованю заєднїцкей прешлосци и вибудови заєднїцкей будучносци сербского и мадярского народу. Скупштина АП Войводини предлужи потримовац таки инициятиви же би робота наших науковцох и институцийох була транспарентна и значна у явносци», поручел Югас. 
Визначуюци подзековносц предсидательови Югасови на нащиви и указаному интересованю за проєкти Матици сербскей, предсидатель Станич визначел же ше Матица сербска зоз сербско-мадярскима културнима вязами занїма през свою историю, же два народи нєрозтаргуюцо вязани зоз свою историю и културу и же важне будуцим ґенерацийом преношиц вредносци медзисобного розуменя, почитованя и сотруднїцтва, як и свидомосц о заєднїцким културним нашлїдству хторе представя моцни фундамент за дальше моцнєнє сербско-мадярских одношеньох.
Учашнїки сходу бешедовали и о будуцих напрямох виглєдованя сербско-мадярских литературних и културних одношеньох, як и о можлївосцох за предлужованє и ширше представянє резултатох потерашнєй роботи.