Канїжа/Нови Сад, 12. юний – Предсидатель Скупштини АП Войводини др Балинт Югас присуствовал нєшка на шветочним отвераню атлетскей дражки у Канїжи, хтора вибудована у рамикох проєкту AFALL – Атлетика за шицких, а хтори ше реализує зоз потримовку Програми Interreg VI-А IPA Мадярска–Сербия.
Тота дражка, чия вредносц 340.000 евра, вибудована з цильом унапредзованя фахового усовершованя спортистох, тренерох и наставнїкох, як и розвою спортскей инфраструктури у погранїчним подручу Сербиї и Мадярскей. Партнере на проєкту були Општина Канїжа як водзаци хаснователь, Општина Алдя зоз Мадярскей и Атлетски союз Войводини.
Бешедуюци присутним, предсидатель Скупштини АП Войводини визначел же Войводина ма вельки спортски потенциял, цо потвердзую успихи винїмкових атлетичарох як цо то Адриана Вилаґош, алє и числених младих спортистох хтори зоз своїма резултатами указую же єст таланту.
«Лєм талант нє достаточни. Потребни родичи, тренере, приклади и места на хторих млади годни розвивац свойо способносци. Прето таки проєкти важни, бо творя условия же би дзеци и млади достали нагоду тренирац, напредовац и шнїц вельки спортски сни», поручел предсидатель Югас.
Вон наглашел же тот проєкт приклад успишного прейґгранїчного сотруднїцтва хторе дава конкретни и тирваци хасен локалней заєднїции додал же Покраїна предлужи укладац до спортскей инфраструктури и програмох за младих.
Вкупни буджет часци проєкту AFALL хтори ше реализує у Канїжи виноши 503.414 евра. Општини Канїжа одобрени IPA средства у суми 428.347 евра, а Покраїнски секретарият за финансиї обезпечел 8,5 милиони динари за софинансованє проєкту.
Попри предсидателя Югаса, присутних привитали Роберт Фейстамер, предсидатель општини Канїжа, Ґоран Обрадович, предсидатель Атлетского союзу Войводини и Слободан Бранкович, предсидатель Атлетского союзу Сербиї.