Нови Сад, 29. юлий – Предсидатель Скупштини АП Войводини др Балинт Югас приял нєшка до одпитуюцей нащиви амбасадора Мадярскей Йожефа Мадяра, з нагоди закоченя його дипломатского мандату у Републики Сербиї.
Под час нащиви визначене же у остатнїх рокох партнерски и приятельски одношеня Сербиї и Мадярскей досцигли найвисши уровень у сучасней историї хтори, ше попри политичного и економского сотруднїцтва, спатраю и у потримовки очуваню идентитету мадярскей националней заєднїци у Войводини.
Предсидатель Скупштини АПВ подзековал амбасадорови Мадярови на його пошвеценей длугорочней роботи и доприношеню моцнєню довирия медзи двома жемами, як и на анґажману у унапредзованю сотруднїцтва хторе було значне за припаднїкох мадярскей заєднїци у Сербиї.
Собешеднїки бешедовали и о значносци предлужованя потримовки проєктом хтори доприноша очуваню мадярского язику и култури, розвою образованя на мацеринским язику, як и моцнєню прейґгранїчного сотруднїцтва хторе повязує людзох и институциї Сербиї и Мадярскей.
Амбасадор Мадяр подзековал на потерашнїм сотруднїцтве и визначел значносц одношеня хтори вибудовани на медзисобним почитованю и довирию, визначуюци моцне доприношенє мадярскей заєднїци у Войводини у твореню одличних вязох медзи двома жемами. Собешеднїки оценєли же предлужованє сотруднїцтва Сербиї и Мадярскей будзе од окремней значносци и у наступним периодзе, як за два держави, так и за шицких гражданох хтори у нїх жию.