Суботица, 2. септембер – Предсидатель Скупштини АП Войводини др Балинт Югас нащивел нєшка Основну школу «Майшанска драга» у Суботици, дзе зоз средствами з покраїнского буджету, у суми коло 11,5 милиони динари, реконструовани школски полиґон за транспортне образованє.
«Розвой образовних установох, за нас, нє значи лєм обнову будинкох. За кажду инвестицию стої исти циль, же би дзеци учели у безпечнєйших, сучаснєйших и лєпших условийох, а просвитни роботнїки мали одвитуюци условия за свою роботу», виявел Югас, хтори школу и полиґон хтори реконструовани после скоро 50 рокох нащивел вєдно з подпредсидательом Покраїнскей влади и покраїнским секретаром за образованє, предписаня, управу и национални меншини – национални заєднїци Робертом Ототом и помоцнїцу городоначалнїка Суботици за обласц образованя, здравственей и социялней защити Гайналку Матин.
Предсидатель Югас визначел же значносц укладаня до школскей инфраструктури и векша маюци у оглядзе же у ОШ «Майшанска драга» того школского року число школярох звекшане на 620, цо 20 вецей як прешлого року, а формоване ище єдно оддзелєнє.
«Окреме радує же на початку нового школского року до першей класи рушели 84 школяре, до штирох оддзелєньох, по два на сербским и мадярским наставним язику. Тото указує же важне же би численосц школярох провадзело и творенє лєпших и безпечнєйших условийох за їх образованє», гварел Югас.
Покраїна на конкурсу за инвестицийни укладаня у 2025. року обезпечела коло 11,5 милиони динари за реконструкцию школского полиґону за транспортне образованє. У рамикох роботох асфалтовани вецей як 1.000 квадратни метери поверхносци, обновена горизонтална сиґнализация, поставени 61 транспортни знак, а тот полиґон буду хасновац и други суботицки школи.
Тота инвестиция часц ширшого и длугорочного процесу укладаня до образованя. Од 2020. по 2026. рок за розвой образовних установох на териториї Суботици з покраїнских жридлох опредзелени коло 179 милиони динари.
«Лєм у 2025. року видвоєли зме 500 милиони динари за унапредзованє условийох у 88 образовних установох у Войводини, а од 2016. по 2026. рок, и коло 3,35 милиярдох динарох, релизовани укладаня до коло 400 образовних установох у покраїни», наведол Югас.
Помоцнїца Матин подзековала предсидательови Югасови и секретарови Ототови на континуованей помоци и укладаньох Покраїни до модернизациї образовних институцийох у Суботици. Вона визначела и мири, наменєни фамелийом и дзецом, з хторима локална самоуправа помага школованє як цо то безплатни учебнїки за основцох, студентски стипендиї и други.
Под час нащиви, Югас бешедовал з руководством школи о условийох у яких ше трима наставу, потерашнїх укладаньох, як и о потребох и приоритетох за дальше унапредзованє школскей инфраструктури и условийох за школярох и просвитних роботнїкох.