Нови Сад, 9. октобар – У Науково-технолоґийним парку Нови Сад нєшка отримана отвераюца конференция стратеґийного проєкту «Розвой гранїчного преходу Сантово – Бачки Брег II», хтору ше реализує у рамикох програми Interreg VI-A IPA Мадярска – Сербия 2021–2027, з финансийну потримовку Европскей униї. Водзаци партнер на проєкту Министерство будовательства и транспорту Мадярскей, док партнере зоз сербского боку ЯП «Драги Сербиї» и ЯП «Завод за урбанизем Войводини».
Предсидатель Скупштини АП Войводини др Балинт Югас визначел же унапредзенє гранїчного преходу представя важни крочай у повязованю Сербиї и Мадярскей, розвою терховного транспорту и твореню лєпших условийох за привреду и жительство з обидвх бокох гранїци.
«Войводина нє конєц европскей транспортней мрежи. Войводина крижна драга, а крижна драга вредзи тельо кельо єй драги отворени», поручел Югас и здогаднул же розвой транспортней вязи Баї, Сантова, Бачког Брегу и Зомбора тирва длужей як два децениї, прейґ найменєй пейц повязаних прейґранїчних проєктох и з вецей як дзешец милионами евра хтори уложени до пририхтованя и розвою того напряму.
Наводзаци приклад гайзибанскей вязи Суботици и Сеґедину, на чиїм пририхтованю документациї участвовал даскельо роки, Югас визначел же резултати прейґгранїчного сотруднїцтва поставаю часц каждодньового живота. Нєшка по тей гайзибанскей драги рочнє путую коло 100.000 людзе.
«То сущносц прейґгранїчного сотруднїцтва: добра идея постава проєкт, проєкт инфраструктура, а инфраструктура час хтори врацаме людзом и привреди, гварел Югас.
Вкупна вредносц проєкту «Hercegszántó – Bački Breg II» виноши 3.064.650 евра, од хторих Европска уния обезпечує 85 посто, односно 2.604.952,50 евра. Реализация планована до 30. априла 2028. року. На сербским боку предвидзени виробок технїчней документациї, вибудов першей фази часци путнїцкого терминалу и цалого терховного терминалу, як и надпатрунок над роботами. На мадярским боку будзе набавена и уградзена сучасна опрема за контролу терховних превозкох, уключуюци 3Д ласерски скенер, ИТ опрему, сиґнализацию, контролну систему и видео-надпатрунок.
Югас наглашел же окремна значносц проєкту у тим же терховни транспорт на тим преходзе моментално огранїчени на превозки до 3,5 тони, док ше з унапредзеньом инфраструктури оможлїви їх значнєйшу улогу у медзинародним превоженю роби и розтерховйованє других гранїчних преходох медзи Сербию и Мадярску.
«Прешлого року робна черанка Сербиї и Мадярскей досцигла коло 3,4 милиярди евра. За тим числом стоя подприємства, продукователє, роботни места и роба хтора муши сцигнуц до тарґовища. Кажда годзина менєй на гранїци значи векшу конкурентносц нашей привреди», визначел Югас и додал же ше од Бачкого Брегу розвива и будуци драгови напрям през Войводину, длугоки коло 185,5 километери, хтори будзе прейґ Зомбору, Кули, Вербасу и Србобрану водзиц до румунскей гранїци.
«Нє бешедуєме лєм о єдним гранїчним преходу, алє о повязованю цалого реґиону. Розвой инфраструктури значи швидше рушанє людзох, лєгчейши приступ ґу тарґовищом и нови можлївосци за привреду и локални заєднїци», поручел Югас, додаваюци же ше добри одношеня Сербиї и Мадярскей потвердзує з конкретнима проєктами хтори приноша хасен гражданом.
На отвераюцей конференциї присуствовали и Неманя Мартинович, помоцнїк министра за европски интеґрациї Републики Сербиї, Жолт Барна, державни секретар компетентни за драгови транспорт у Министерстве будовательства и транспорту Мадярскей, Єлена Прица, помоцнїца покраїнского секретара за реґионални розвой, медзиреґионалне сотруднїцтво и локалну самоуправу, Антонио Раткович, городоначалнїк Зомбору, Миодраґ Поледица, помоцнїк директора ЯП «Драги Сербиї», и Предраґ Кнежевич, директор ЯП «Завод за урбанизем Войводини».