Нови Сад, 21. октобер – Предсидатель Скупштини АП Войводини др Балинт Югас участвовал нєшка на закончуюцей конференциї проєкту STOP FIRES – «Моцнєнє орґанизацийох у защити од огньох», на хторей представени резултати прейґгранїчного сотруднїцтва Сербиї и Мадярскей у превенциї и защити од лєсових огньох.
«Окремна вредносц того проєкту у тим же його резултати нє оставаю лєм на паперу. Їх видно и у новей опреми, сучасних системох, знаню и лєпшей порихтаносци людзох хтори перши на терену. Технолоґия може перша збачиц дим, алє огень на концу гаша людзе», наглашел Югас.
Проєкт STOP FIRES реализовани у рамикох програми прейґгранїчного сотруднїцтва VI-A IPA Мадярска-Сербия, з вкупним буджетом од 1,63 милиони евра, а Европска уния финансовала 85 одсто. Водзаци партнер ЯП «Войводиналєси», а партнере и Фонд «Европски роботи» АП Войводини, Министерство нукашнїх дїлох Републики Сербиї – Сектор за позарядово ситуациї и мадярске лєсарске подприємство KEFAG.
У рамикох проєкту запровадзена система за детекцию и провадзенє лєсових огньох, набавена специялизована огньогасно-ратовацка превозка, виробена студия о под’жемних водох Суботицкей писковини и орґанизовани заєднїцки оспособйованя сербских и мадярских службох. Проєкт допринєсол и виробку прейґгранїчного плану за позарядово ситуациї у случаю лєсових огньох, як пилот-проєкт тей файти у реґиону. Опрема обезпечена и за пейц добродзечни огньогасни дружтва Сиверней Бачки.
Югас здогаднул и на тогорочни огень на Делиблатскей писковини, дзе у гашеню и защити населєньох участвовали професионални и добродзечни огньогасци, заняти у «Войводиналєсох», припаднїки Министерства нукашнїх дїлох и Войска Сербиї, жителє и медзинародни тими.
«Тото искуство нас здогадує кельо важне на час обачиц огень, добра пририхтаносц и заєднїцке дїствованє. Огень нє позна гранїци прето ше анї защита од огня нє шме застановиц на гранїци. Нє чекаме позарядову ситуацию же бизме почали сотрудзовац, алє заєдн процедури,опрему, знанє и довириє будуєме напредок», поручел Югас и визначел же таки проєкти представяю конкретни приклад хасну од европскей потримовки и партнерства.
«Нєшкайша конференция закончена, алє робота на защити людзох и природи нє ма закончуюцу конференцию. Проєкт ма конєц, безпечносц ю нє ма», заключел Югас.
Роланд Кокаи, киректор ЯП «Войводиналєси», водзаци партнер на тим проєкту, визначел же резултати допринєсли ґу тому же ЕУ уж опредзелї средства за нови «STOP FIRES 2» проєкт. Директор фонду «Европски роботи» АПВ Оґнєн Допуч наглашел же 1,1 милион евра зоз того проєкту уложене до набавки специялних превозкох и опреманє службох, и же тот Фонд надалєй значну увагу да проєктному оспособйованю и помоци добродзечним огньогасним дружтвом.
На конференциї представени резултати проєкту, прейґгранїчни план за позарядово ситуациї, як и систему за вчасне обачованє и провадзенє лєсових огньох и опрему.