Покраїнскa скупштинска одлука о Скупштини Автономней Покраїни Войводини
("Сл. новини АП Войводини", число 28/2014)
На основи члена 31. алинея 2. и члена 43. пасус 1. Статута Автономней Покраїни Войводини («Службени новини АПВ», число 20/2014),
Скупштина Автономней Покраїни Войводини, на схадзки хтора отримана 02. юлия 2014. року, принєсла
ПОКРАЇНСКУ СКУПШТИНСКУ ОДЛУКУ
О СКУПШТИНИ АВТОНОМНЕЙ ПОКРАЇНИ ВОЙВОДИНИ
ОСНОВНИ ОДРЕДБИ
Член 1.
Зоз тоту покраїнску скупштинску одлуку ше ушорює орґанизацию и способ роботи Скупштини Автономней Покраїни Войводини (у дальшим тексту: Скупштина), права и длужносци посланїкох, финансованє Скупштини, явносц роботи Скупштини и положенє Служби Скупштини (у дальшим тексту: Служба), як и други питаня хтори значни за Скупштину.
Питаня у вязи з орґанизацию и способом роботи Скупштини и єй роботних целох, поступками за приношенє актох Скупштини и другима поступками, як и други питаня хтори нє ушорени з тоту одлуку, блїжей ше ушорює з Дїловнїком о роботи Скупштини (у дальшим тексту: Дїловнїк) и другима актами Скупштини.
Член 2.
Скупштина найвисши орґан Автономней Покраїни Войводини (у дальшим тексту: АП Войводина) хтори окончує нормативни и други функциї, у складзе з Уставом, законом и Статутом.
Член 3.
Шедзиско Скупштини у Новим Садзе.
Член 4.
Скупштину представя предсидатель Скупштини.
Член 5.
Робота Скупштини явна.
Член 6.
Скупштина ма печац.
Печац Скупштини округли и ма герб Републики Сербиї и герб Автономней Покраїни Войводини и под нїм текст: «Република Сербия – Автономна Покраїна Войводина – Скупштина Автономней Покраїни Войводини», виписани на сербским язику, з кирилским писмом и на мадярским, словацким, горватским, румунским и руским язику и писме.
Текст печаца ше виписує у концентричних кругох коло гербу Републики Сербиї и гербу Автономней Покраїни Войводини, у складзе зоз законом.
Член 7.
Скупштина приноши и меня Статут, приноши покраїнски скупштински одлуки, одлуки, резолуциї, декларациї, препоруки, Дїловнїк, заключеня и други общи акти.
Поступки за приношенє актох зоз пасуса 1. того члена ше блїжей ушорює з Дїловнїком.
Акти зоз пасуса 1. того члена ше обявює у «Службених новинох Автономней Покраїни Войводини».
Член 8.
У роботи Скупштини, попри сербского язика и кирилского писма, ровноправно ше службено хаснує и мадярски, словацки, горватски, румунски и руски язик и їх писма, у складзе зоз законом.
КОНСТИТУОВАНЄ СКУПШТИНИ
Член 9.
Скупштина ма 120 посланїкох.
Скупштина на першей схадзки потвердзує мандати посланїком, по поступку як утвердзене з Дїловнїком.
Скупштина конституована з потвердзованьом мандата двох трецинох посланїкох.
На першей схадзки ше вибера предсидателя и подпредсидательох Скупштини, менує ґенералного секретара Скупштини, формує посланїцки ґрупи, а можу ше формовац и роботни цела Скупштини.
ОРҐАНИЗАЦИЯ СКУПШТИНИ
Предсидатель Скупштини
Член 10.
Предсидатель Скупштини представя Скупштину у жеми и иножемстве, предшедує и руководзи зоз схадзками Скупштини, розписує виберанки за посланїкох, подписує акти хтори принєсла Скупштина и окончує други роботи яки одредзени зоз Статутом и Дїловнїком.
Член 11.
Предсидателя Скупштини ше вибера зоз шора посланїкох.
Поступок вибору предсидателя Скупштини ше блїжей ушорює з Дїловнїком.
Член 12.
Мандат предсидателя Скупштини тирва штири роки.
Предсидательови Скупштини престава функция скорей як вишол час на хтори є вибрани: зоз задзекованьом, розришеньом або з преставаньом мандата посланїкох.
По вибор нового предсидателя, функцию предсидателя Скупштини дочасно окончує найстарши подпредсидатель Скупштини.
Поступок у случаю преставаня функциї предсидательови скорей як вишол час на хтори є вибрани ше блїжей ушорює з Дїловнїком.
Подпредсидатель Скупштини
Член 13.
При каждим конституованю, Скупштина, з окремну одлуку утвердзує число подпредсидательох Скупштини, на предкладанє предсидателя.
Подпредсидатель Скупштини помага предсидательови Скупштини у окончованю роботох з його дїлокругу.
Предсидателя Скупштини, у случаю його одсутносци або зопартосци окончовац функцию, заменює єден зоз подпредсидательох Скупштини.
Член 14.
На вибор и преставанє функциї подпредсидателя Скупштини ше применює одредби тей одлуки о виборе и преставаню функциї предсидателя Скупштини.
Колеґиюм Скупштини
Член 15.
Колеґиюм Скупштини (у дальшим тексту: Колеґиюм) то цело Скупштини хторе зволує предсидатель Скупштини пре координацию роботи и окончованє консултацийох у вязи з роботу Скупштини.
Колеґиюм творя предсидатель Скупштини, подпредсидателє Скупштини и предсидателє посланїцких ґрупох у Скупштини.
На схадзкох Колеґиюму можу присуствовац и особи хтори нє члени Колеґиюму, на поволанку предсидателя Скупштини.
Колеґиюм помага предсидательови Скупштини у представяню Скупштини, зволованю схадзкох Скупштини, утвердзованю предкладаня дньового шора, ускладзованю роботи роботних целох и других питаньох з компетенциї предсидателя Скупштини.
Предсидатель Скупштини приноши Правила о роботи Колеґиюму.
Роботне цело за националну ровноправносц
Член 16.
Скупштина формує роботне цело за националну ровноправносц.
Вибор, компетенцию и способ роботи роботного цела за националну ровноправносц ше ушорює з Дїловнїком.
Роботни цела Скупштини
Член 17.
Скупштина формує стаємни роботни цела, а може формовац и дочасни роботни цела.
Стаємни роботни цела то одбори.
Дочасни роботни цела то анкетни одбори и комисиї.
Одбори ше формує за розпатранє и претресанє питаньох з компетенциї Скупштини, предкладанє актох, як и спатранє стану у одредзених обласцох и окончованє других роботох яки одредзени з Дїловнїком.
Дочасне роботне цело мож формовац пре спатранє стану у одредзеней обласци и утвердзованє фактох о поєдиних зявеньох або подїйох.
Состав и задаток дочасного роботного цела ше утвердзує з одлуку Скупштини.
Член 18.
Одбор ма предсидателя и заменїка предсидателя.
Предсидатель одбору руководзи з роботу одбору.
Вибор, состав, дїлокруг и способ роботи одбору ше ушорює з Дїловнїком.
Посланїцки ґрупи
Член 19.
У Скупштини мож формовац посланїцки ґрупи зоз шора посланїкох.
Посланїцку ґрупу представя предсидатель посланїцкей ґрупи.
Условия под якима ше формує посланїцку ґрупу, способ роботи и представянє посланїцких ґрупох ше ушорює з Дїловнїком.
Нєформални ґрупи
Член 20.
Посланїки у Скупштини ше можу орґанизовац до одредзених нєформалних ґрупох з цильом промоциї права одредзених ґрупацийох и дзвиганя свидомосци о їх улоги у дружтве, як и промоциї одредзених дружтвених вредносцох.
Условия под якима ше формує нєформалну ґрупу, способ роботи и представянє нєформалних ґрупох ше ушорює з Дїловнїком.
Ґенерални секретар Скупштини
Член 21.
Ґенералного Секретара Скупштини (у дальшим тексту: ґенерални секретар) менує Скупштина, на предкладанє предсидателя Скупштини.
Ґенерални секретар помага предсидательови и подпредсидательом Скупштини у пририхтованю и водзеню схадзкох Скупштини, стара ше о запровадзованю одлукох и заключеньох Скупштини, руководзи зоз Службу и окончує други роботи яки утвердзени зоз законом, одлуку и Дїловнїком.
Ґенерални секретар за свою роботу одвичательни Скупштини и предсидательови Скупштини.
Функция ґенералного секретара престава з дньом менованя ґенералного секретара нового зволаня Скупштини, зоз задзекованьом або з розришеньом.
Член 22.
Ґенерални секретар ма заменїка хтори му помага у роботи и заменює го у случаю його одсуства або зопартосци окончовац роботи.
Заменїка ґенералного секретара менує Скупштина, на предкладанє ґенералного секретара, зоз согласносцу предсидателя Скупштини.
Число заменїкох ґенералного секретара ше утвердзує з Дїловнїком.
Заменїк ґенералного секретара за свою роботу одвичательни Скупштини и предсидательови Скупштини.
Функция заменїка ґенералного секретара престава з дньом менованя нового заменїка ґенералного секретара, зоз задзекованьом або з розришеньом.
Член 23.
Ґенералного секретара и заменїка ґенералного секретара ше розришує по поступку яки предвидзени за їх менованє.
По менованє нового ґенералного секретара, длужносц ґенералного секретара окончує заменїк ґенералного секретара.
СПОСОБ РОБОТИ СКУПШТИНИ
Член 24.
Скупштина роби на схадзкох у складзе зоз Статутом и Дїловнїком.
Схадзку Скупштини зволує предсидатель Скупштини.
Предсидатель Скупштини може, з нагоди державних и медзинародних шветох и означованя историйних рочнїцох, зволац шветочну схадзку.
Предсидатель Скупштини може, пре розпатранє питаньох хтори ше одноша на водзенє политики у одредзеней обласци и питаньох од ширшого привредного, културного и политичного значеня зволац тематичну схадзку.
Зволованє и отримованє схадзкох Скупштини ше блїжей ушорює з Дїловнїком.
Член 25.
Скупштина одлучує з векшину гласох на схадзки на хторей присутна векшина вкупного числа посланїкох, кед зоз Статутом нє предведзена окремна векшина.
Скупштина одлучує з двотрецинску векшину гласох од вкупного числа посланїкох:
- о приношеню и пременки Статута;
- о приношеню Покраїнскей скупштинскей одлуки и за запровадзованє Статута;
- о приношеню Покраїнскей скупштинскей одлуки о символох АП Войводини;
- о виборе и розришеню Покраїнского защитнїка гражданох - омбудсмана;
Скупштина одлучує з векшину гласох од вкупного числа посланїкох:
- о скорейчасовим преставаню мандата Скупштини;
- о розписованю покраїнского референдума;
- о приношеню буджету АП Войводини и прилапйованю закончуюцого рахунку;
- о виборе и розришеню предсидателя и подпредсидательох Скупштини;
- о виборе и розришеню предсидателя и подпредсидательох и членох Покраїнскей влади;
- о приношеню Дїловнїка о роботи Скупштини.
Член 26.
Одбори и роботни цела робя на схадзкох.
Схадзки одборох Скупштини явни, окрем кед за дзепоєдну схадзку одбор нє одлучи иншак.
Гласанє у одборе явне.
Одбор одлучує з векшину гласох присутних членох на схадзки на хторей присуствує векшина членох одбору.
Член 27.
Скупштина хторей скорейчасово престал мандат окончує лєм чечуци и нєодкладаюци роботи яки одредзени зоз законом и покраїнску скупштинску одлуку.
ПРАВА И ДЛУЖНОСЦИ ПОСЛАНЇКОХ
Член 28.
Мандат посланїкох почина чечиц з дньом потвердзованя мандатох у Скупштини и тирва штири роки, односно по преставанє мандатох посланїкох того зволаня Скупштини.
Посланїкови ше видава посланїцку леґитимацию, зоз хтору посланїк доказує статус посланїка и на основи хторей витворює права яки утвердзени з Одлуку.
Посланїцку леґитимацию ше хаснує и як идентификацийну карточку при хаснованю електронскей системи за гласанє, на схадзкох Скупштини.
Формулар, змист, способ видаваня посланїцкей леґитимациї и водзенє евиденциї видатих леґитимацийох ше предписує з актом одбору цо компетентни за административни питаня.
Член 29.
Посланїк шлєбодно розполага зоз своїм мандатом у складзе з Уставом и покраїнску скупштинску одлуку о виборе посланїкох до Скупштини.
Член 30.
Посланїк ше опредзелює, виступа и гласа по власним прешвеченю.
Посланїк нє може буц поволани на виновну одвичательносц, приварти або покарани пре винєшене думанє або даванє гласа на схадзкох Скупштини и єй роботних целох.
Член 31.
Посланїк нє може источашнє окончовац другу явну функцию и длужносц хтора нєзлучна з посланїцку функцию, у складзе з Уставом и законом.
Член 32.
Посланїк ма право у Скупштини хасновац язик и писмо чийо службене хаснованє утвердзене зоз Статутом, покраїнску скупштинску одлуку и Дїловнїком.
Член 33.
Посланїк, у складзе з покраїнску скупштинску одлуку и Дїловнїком, ма право:
1. предкладац покраїнски скупштински одлуки, одлуки и други акти;
2. подношиц амандмани на предлоги покраїнских скупштинских одлукох, одлукох и других актох;
3. участвовац у розправи и одлучованю о предлогу покраїнских скупштинских одлукох, одлукох и других актох на схадзкох Скупштини и єй одборох;
4. подношиц предкладанє за формованє анкетного одбору або комисиї;
5. подношиц предкладанє же би Скупштина була предкладач републичного закона, односно же би Скупштина поднєсла амандман на предлог републичного закона;
6. предкладац вименки и дополнєня дньового шора;
7. поставяц посланїцки питаня;
8. поднїмац други дїї у окончованю посланїцкей функциї, у складзе з Дїловнїком.
Посланїк хтори нє член одбору може участвовац у роботи одбору без права одлучованя, у складзе з Дїловнїком.
Член 34.
Посланїк ма право и длужносц буц благочасно и подполно обвисцени о шицких питаньох з компетенциї Скупштини, як и право вимагац обвисценя яки му потребни за окончованє посланїцкей функциї од предсидателя Скупштини, предсидательох одборох и других роботних целох Скупштини, члена Покраїнскей влади и функционерох у других покраїнских орґанох и орґанизацийох.
Способ витворйованя права зоз пасуса 1. того члена ше блїжей ушорює з Дїловнїком.
Член 35.
Посланїк, за окончованє посланїцкей функциї, ма право на плацу, надополнєня и други приманя, у складзе зоз законом и актом одбору цо компетентни за административни питаня.
Член 36.
Посланїк хтори витворює плацу у Скупштини ма право на надополнєнє плаци по преставаню посланїцкей функциї найдлужей три мешаци, на основи поднєшеного вимаганя.
Тото право мож предлужиц до три мешаци, кед у тих трох мешацох здобува право на пензию.
Право зоз пасуса 1. того члена нє припада посланїкови хтори зоз правомоцну судску одлуку осудзени на безусловну кару гарешту у тирваню найменєй шейсц мешаци.
Право зоз пасуса 1. того члена престава: на вимаганє посланїка, зоз снованьом роботного одношеня, здобуваньом права на пензию, як и у случаю вибору, односно менованя на другу функцию по основи хторей витворює плацу.
Член 37.
Посланїкови мандат престава з преставаньом мандата зволаня Скупштини, як и у случайох яки утвердзени з покраїнску скупштинску одлуку о виборе посланїкох до Скупштини.
Член 38.
Посланїк длужен:
- почитовац Устав, Закон, Статут и Дїловнїк.
- присуствовац на схадзкох и участвовац у роботи Скупштини и єй одборох чий є член;
- поступац у складзе з одлуками компетентного одбору Скупштини;
- хасновац идентификацийну карточку на способ як предписане з Дїловнїком;
- у окончованю посланїцкей длужносци и зоз своїм вкупним справованьом чувац угляд, почитовац достоїнство и порядок на схадзки Скупштини, одборох и посланїцких ґрупох;
- обрацац ше ґу другим посланїком з уважованьом, без увредлївих виразох и виношеня фактох и оценох хтори ше одноша на приватни живот других особох;
- одношиц ше одвичательно и рационално ґу средством буджету Автономней Покраїни Войводини хтори наменєни за роботу Скупштини;
- подношиц звит компетентному державному орґану о своїм маєтку и приходох, у складзе зоз законом;
- вивершовац други обовязки, у складзе з покраїнску скупштинску одлуку и Дїловнїком.
ФИНАНСОВАНЄ СКУПШТИНИ
Член 39.
Средства за витворйованє компетенцийох Скупштини ше обезпечує у буджету Автономней Покраїни Войводини (у дальшим тексту: буджет АП Войводини).
Член 40.
Скупштина самостойно утвердзує и розполага зоз средствами за роботу Скупштини (у дальшим тексту: скупштински буджет).
Скупштински буджет состойна часц буджету АП Войводини.
Покраїнска влада нє може без согласносци предсидателя Скупштини застановиц, одложиц або огранїчиц вивершованє скупштинского буджету.
Ґенерални секретар налогодавец за хаснованє средствох скупштинского буджету.
Поступок за утвердзованє скупштинского буджету ше ушорює зоз тоту одлуку.
Член 41.
Ґенерални секретар пририхтує предлог скупштинского буджету у складзе з предписанями з якима ше ушорює буджетну систему и подноши го компетентному одбору Скупштини.
Компетентни одбор Скупштини утвердзує предлог скупштинского буджету и доручує го покраїнскому секретарияту цо компетентни за финансиї на думанє.
О предлогу зоз пасуса 2. того члена покраїнски секретарият цо компетентни за финансиї доручує обгрунтоване думанє компетентному одбору Скупштини и нєпоштредно ше вияшнює на схадзки компетентного одбору Скупштини, пре посцигованє согласносци.
У случаю посцигованя согласносци зоз пасуса 3. того члена, компетентни одбор Скупштини утвердзує скупштински буджет, хтори покраїнски секретарият цо компетентни за финансиї без вименкох уключує до нарису буджету АП Войводини, а Покраїнска влада без вименкох до предлогу покраїнскей скупштинскей одлуки о буджету АП Войводини.
Кед ше нє посцигнє согласносц медзи компетентним одбором Скупштини и покраїнским секретариятом цо компетентни за финансиї, покраїнски секретарият цо компетентни за финансиї предлог скупштинского буджету зоз пасуса 2. того члена без вименкох уключує до нарису буджету АП Войводини, а Покраїнска влада без вименкох до предлогу покраїнскей скупштинскей одлуки о буджету АП Войводини.
У случаю зоз пасуса 5. того члена, Покраїнска влада у обгрунтованю предлогу покраїнскей скупштинскей одлуки наводзи причини пре хтори покраїнски секретарият цо компетентни за финансиї трима же предлог скупштинского буджету нє прилаплїви.
Член 42.
Контрола вивершеня скупштинского буджету ше запровадзує по предписаньох о буджетней инспекциї и державней ревизиї.
ОДНОШЕНЄ СКУПШТИНИ И ПОКРАЇНСКЕЙ ВЛАДИ
Член 43.
Покраїнска влада одвичательна Скупштини за свою роботу.
Покраїнска влада подноши рядови рочни звит о роботи Скупштини, а на єй вимаганє и позарядово звити о роботи.
Поступок контроли над роботу Покраїнскей влади або члена Покраїнскей влади ше блїжей ушорює з Дїловнїком.
На початку каждей схадзки Скупштини, пред утвердзованьом дньового шора, у часци схадзки «Питаня посланїкох, предкладаня и информациї», посланїки можу поставяц питаня и вимагац информациї.
На питаня посланїкох одвитує предсидатель, подпредсидателє и члени Покраїнскей влади, односно особи хтори вони овласца.
Часц схадзки хтора пошвецена поставяню питаньох и вимаганю информацийох тирва найдлужей 60 минути.
Поступок вязани за «Питаня посланїкох, предкладаня и информациї» ше блїжей ушорує з Дїловнїком.
СОТРУДНЇЦТВО ЗОЗ ТЕРИТОРИЯЛНИМА ЗАЄДНЇЦАМИ ДРУГИХ ДЕРЖАВОХ
Член 44.
Скупштина сотрудзує з одвитуюцима орґанами териториялних заєднїцох и другима формами автономиї других державох у рамикох вонкашнєй политики Републики Сербиї и з обовязку почитованя єй териториялного єдинства и правного ушореня.
Скупштина заключує спорозуменя з одвитуюцима териториялнима заєднїцами других державох, у складзе зоз законом.
Форми сотруднїцтва и поступок при заключованю спорозуменя ше блїжей ушорює з окремним актом.
ЯВНОСЦ РОБОТИ СКУПШТИНИ
Член 45.
Явносц роботи Скупштини ше обезпечує: з твореньом условийох за телевизийни преноси схадзкох Скупштини, з конференциями за новинарох, з видаваньом урядових сообщеньох, з оможлївйованьом медийом, припатрачом домашнїх и медзинародних орґанизацийох, нєвладових орґанизацийох и заинтересованим гражданом провадзиц роботу Скупштини, з увидом до документацийного и архивного материялу Скупштини, з увидом до записнїкох зоз схадзкох Скупштини, прейґ интернету, на иншаки способи, у складзе зоз законом и Дїловнїком.
Нукашнї порядок у будинку Скупштини, под час отримованя схадзкох Скупштини ше будзе ушорйовац з окремним актом.
Член 46.
Схадзки Скупштини можу буц заварти за явносц у случайох яки одредзени зоз законом.
Поступок зоз пасуса 1. того члена ше ушорює з Дїловнїком.
СЛУЖБА СКУПШТИНИ
Член 47.
Служба окончує фахово, административно-технїчни и други роботи за потреби Скупштини и єй роботних целох, посланїкох, предсидателя и подпредсидателя Скупштини, посланїцких ґрупох у Скупштини як и други роботи, у складзе з Дїловнїком и другима актами Скупштини и єй роботних целох.
Член 48.
Зоз Службу руководзи ґенерални секретар.
Член 49.
У поглядзе руководзеня з роботу Служби, снованя и преставаня роботного одношеня занятих, витворйованя правох, длужносцох и одвичательносцох занятих у Служби, як и хаснованя и розполаганя зоз средствами за роботу, Скупштини и Служби Скупштини, ґенерални секретар ма право и длужносци старшини хтори руководзи з орґаном покраїнскей управи.
Член 50.
Питаня у вязи з орґанизацию и способом роботи Служби ше блїжей ушорює з одлуку о Служби.
Член 51.
Ґенерални секретар приноши правилнїки, одлуки, розкази, упутства и ришеня.
Правилнїк о нукашнєй орґанизациї и систематизациї роботних местох у Служби приноши ґенерални секретар зоз согласносцу одбору цо компетентни за административни питаня.
ЗАКОНЧУЮЦИ ОДРЕДБИ
Член 52.
Зоз дньом ступаня на моц тей покраїнскей скупштинскей одлуки престава важиц Покраїнска скупштинска одлука о Скупштини Автономней Покраїни Войводини («Службени новини АПВ», число 6/2010, 8/2010-випр. и 21/2010).
Член 53.
Тота покраїнска скупштинска одлука ступа на моц осми дзень по обявйованю у «Службених новинох Автономней Покраїни Войводини».
СКУПШТИНА АВТОНОМНЕЙ ПОКРАЇНИ ВОЙВОДИНИ
Нови Сад, 02. юлия 2014. року
ПРЕДСИДАТЕЛЬ
СКУПШТИНИ АП ВОЙВОДИНИ,
Иштван Пастор, с.р.
(Pásztor István, s.k.)